وزیر اعلیٰ پنجاب ڈویلپمنٹ پروگرام کے تحت جاری ترقیاتی منصوبوں کی مؤثر نگرانی کے لیے محکمہ ہاؤسنگ نے جدید مانیٹرنگ نظام متعارف کرا دیا

وزیر اعلیٰ پنجاب ڈویلپمنٹ پروگرام کے تحت جاری ترقیاتی منصوبوں کی مؤثر نگرانی کے لیے محکمہ ہاؤسنگ نے جدید مانیٹرنگ نظام متعارف کرا دیا ہے۔ سیکرٹری ہاؤسنگ پنجاب نورالامین مینگل کی ہدایت پر اس مقصد کے لیے ایک جدید ڈیش بورڈ تشکیل دیا گیا ہے۔ترجمان کے مطابق ڈیش بورڈ میں جدید مانیٹرنگ فیچرز شامل کیے گئے ہیں جبکہ کام کی رفتار کی رئیل ٹائم نگرانی کے لیے منفرد پیرا میٹرز متعارف کروائے گئے ہیں۔ ضلعی سطح پر کام کرنے والی ٹیمیں روزانہ کی بنیاد پر ڈیش بورڈ پر ڈیٹا اپ لوڈ کرتی ہیں جسے خودکار نظام کے تحت پراسس کیا جاتا ہے۔ترجمان کے مطابق اس ڈیش بورڈ کے ذریعے منصوبوں کے آغاز سے اب تک کی پیش رفت اور روزانہ کی بنیاد پر ہونے والی ترقی کا جائزہ لیا جاتا ہے تاکہ ترقیاتی کاموں کی رفتار اور معیار کو مؤثر انداز میں یقینی بنایا جا سکے۔ترجمان کے مطابق وزیر اعلیٰ پنجاب ڈویلپمنٹ پروگرام کے تحت 15 اضلاع میں 204 ارب روپے مالیت کے ترقیاتی منصوبوں پر کام جاری ہے۔ اس پروگرام کے تحت 2265 کلومیٹر طویل سڑکوں کی تعمیر کا سلسلہ جاری ہے جبکہ 189 کلومیٹر طویل بارشی پانی کے نکاس کے نظام کی تعمیر بھی کی جا رہی ہے۔اسی طرح 752 کلومیٹر سڑکوں کی تعمیر و بحالی کی جائے گی جبکہ مختلف علاقوں میں 86 ڈسپوزل اسٹیشنز اور 9 انڈر گراؤنڈ واٹر ٹینکرز بھی تعمیر کیے جا رہے ہیں۔ترجمان کے مطابق ترقیاتی منصوبوں کی بروقت تکمیل کے لیے سخت اور مؤثر مانیٹرنگ نظام ناگزیر ہے، اسی مقصد کے تحت جدید ٹیکنالوجی کے ذریعے منصوبوں کی نگرانی کو یقینی بنایا جا رہا ہے۔