پھلوں کے بادشاہ آم کو بھی مضر صحت مصالحہ(کیمیکل)لگنے لگا، وزیر اعلیٰ پنجاب مریم نوازشریف کے حکم پر وزیر خوراک پنجاب بلال یاسین فوڈسیفٹی ٹیموں کے ہمراہ کاہنہ نو فروٹ منڈی پہنچ گئے۔ جاری تفصیلات کے مطابق مضر صحت کیمیکل کیلشیم کاربائیڈ سے تیار پھل فروخت کرنے والوں کیخلاف کاروائی کرتے ہوئے900 کلو آم تلف کردیے اورسپلائرز کو وارننگ جاری کردی گئی۔ اس موقع پر وزیرخوراک بلال یاسین کا کہنا ہے کہ تلف کیے گئے پھلوں کو جلدی پکانے کے لیے ممنوعہ کیمیکل کیلشیم کاربائیڈ کا استعمال کیا گیا تھا، کیلشیم کاربائیڈ کیمیکل پیکٹ میں رکھ کر آم کے ڈبوں میں رکھا جاتا ہے۔ بلال یاسین نے مزید کہا کہ وزیر اعلیٰ کے حکم پر روزانہ کی بنیاد پر لاہور سمیت پنجاب بھر میں پھلوں کی چیکنگ کو یقینی بنایا جارہا ہے۔ موسم گرما میں آم کی زیادہ مانگ کی وجہ سے پھل کو جلد پکانے کیلئے کیلشیئم کاربائیڈ کا استعمال کیا جاتا ہے۔ کیلشیم کاربائیڈ سے تیار فروٹ غذائیت کی بجائے صحت کے لیے مضر ثابت ہوتا ہے بیچنے کی اجازت نہیں دی جائے گی۔ وزیر اعلیٰ پنجاب کے مشن صحت مند پنجاب کو عملی جامہ پہنانے کے لیے تمام تر وسائل بروئے کار لائے جارہے ہیں۔ پنجاب میں غذائیت سے بھرپور خوراک اولین ترجیح، جعلسازی پر زیرو ٹالرینس پالیسی ہے۔
