چیئرمین سی ڈی اےمحمد علی رندھاوا کی زیر صدارت سیکٹورل اور اربن ڈویلپمنٹ کے حوالے سے اجلاس

• چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد محمد علی رندھاوا کی زیر صدارت سیکٹورل اور اربن ڈویلپمنٹ کے حوالے سے سی ڈی اے ہیڈکوارٹرز میں اجلاس منعقد ہوا۔ اجلاس میں سی ڈی اے بورڈ کے ممبر پلاننگ و ڈیزائن ڈاکٹر خالد حفیظ، ممبر انوائرمنٹ اسفندیار بلوچ، ممبر فنانس طاہر نعیم ،ڈپٹی کمشنر اسلام آباد عرفان نواز میمن، ڈپٹی کمشنر سی ڈی اے، ڈائریکٹر سیکٹر ڈویلپمنٹ سمیت دیگر متعلقہ سنئیر افسران اور سپارکو کی ٹیکنیکل ٹیم نے شرکت کی۔ اجلاس میں سی ڈی اے اور سپارکو کے درمیان بہتر شہری منصوبہ بندی اور اراضی سے متعلقہ مسائل کی نشاہدہی کے حوالے سے سیٹلائٹ امیجز کی فراہمی کے حوالے سے تبادلہ خیال ہوا۔اجلاس میں سی ڈی اے اور سپارکو کے مابین ایم او یو کے تحت سپارکو کی ٹیکنیکل ٹیم نے سیٹلائٹ امیجز اور ڈیٹا کی فراہمی پر بریفنگ دی۔

چیئرمین سی ڈی اے محمد علی رندھاوا نے کہا کہ سپارکو کی جدید سیٹلائٹ امیجز کی بدولت نئے سیکٹرز میں اراضی کے مسائل کو حل کرنے سمیت غیر قانونی تعمیرات و تجاوزات کے بروقت خاتمے کو یقینی بنانے میں مدد ملے گی۔ انہوں نے کہا کہ سیٹلائٹ ٹیکنالوجی کے استعمال سے سیکٹورل اور نان سیکٹورل علاقوں میں شہری منصوبہ بندی زیادہ مؤثر انداز اور مکمل شفافیت سے ہوگی۔اجلاس کو بریفنگ دیتے ہوئے بتایا گیا کہ سپارکو اسلام آباد کے نئے سیکٹرز کی بہتر منصوبہ بندی اور مسائل کے حل کیلئے سی ڈی اے کو اپنی بھرپور ٹیکنیکل معاونت فراہم کررہا ہے۔ چیئرمین سی ڈی اے نے اس اقدام کو دارالحکومت اسلام آباد میں اسمارٹ اربن پلاننگ کی جانب ایک اہم سنگ میل قرار دیا۔ اجلاس میں چیئرمین سی ڈی اے کو نئے سیکٹرز میں ترقیاتی کاموں کے حوالے سے بریفنگ دیتے ہوئے بتایا گیا کہ سیکٹر C-14 میں ڈویلپمنٹ کا کام اپنے تکمیلی مراحل میں داخل ہوچکا ہے اور سیکٹر C-14 میں سڑکوں پر TST، کرب سٹون سمیت کلوٹس کا جلد مکمل کرلیا جائے گا۔ اسی طرح سیکٹر C-14 میں ڈرینیج، سیوریج اور ہارٹیکلچر کا کام بھی تیزی سے جاری ہے۔اجلاس کو سیکٹر C-15 کے ترقیاتی کاموں کے حوالے سے بریفنگ دیتے ہوئے بتایا گیا کہ سیکٹر C-15 میں ارتھ ورک، سب بیس ورک، ڈرینج سمیت سیوریج کا کام تیزی سے جاری ہے جسکو جلد ہی مکمل کرلیا جائے گا۔اجلاس کو بتایا گیا کہ سیکٹر I-12 میں ڈویلپمنٹ کا کام بھی اپنے تکمیلی مراحل میں داخل ہوچکا ہے اور سیکٹر I-12 میں بیس ورک، TST سمیت دیگر ترقیاتی کام کئے جارہے ہیں۔ اجلاس کو بتایا گیا کہ سیکٹر I-12 کے مرکز میں ترقیاتی کام بھی اپنے تکمیلی مراحل میں داخل ہوچکے ہیں۔اجلاس کو بریفنگ دیتے ہوئے بتایا گیا کہ سیکٹر E-12 کے سب سیکٹر 2 اور 3 میں تعمیراتی کاموں کا آغاز کر دیا گیا ہے۔چیئرمین سی ڈی اے محمد علی رندھاوا نے ان تمام سیکٹرز میں تعمیراتی کاموں کو جلد مکمل کرنے کے ساتھ اعلیٰ معیار کو یقینی بنانے کی ہدایت کی۔ انہوں نے ہدایت کی کہ نئے سیکٹرز میں تمام بنیادی سہولیات کی فراہمی کو یقینی بنایا جائے۔چیئرمین سی ڈی اے نے کہا کہ عرصہ دراز سے نظر انداز سیکٹرز میں ڈویلپمنٹ کا کام نہ صرف دوبارہ شروع کیا بلکہ وہ اپنے تکمیلی مراحل میں داخل ہوچکے ہیں۔ انہوں نے ہدایت کی کہ نئے سیکٹرز میں ڈویلپڈ پلاٹس کا قبضہ جلد از جلد یقینی بنایا جائے۔ انہوں نے مزید کہا کہ شہر میں میگا پراجیکٹس کی تکمیل کے ساتھ سیکٹر ڈویلپمنٹ بھی ہماری اولین ترجیحات میں شامل ہے۔