وزیراعظم پاکستان کی خصوصی ہدایات کے تحت گلگت بلتستان میں جدید آسان خدمت مراکز کے قیام کے منصوبے پر پیش رفت جاری ہے۔ اس سلسلے میں آذربائیجان کے ایک اعلیٰ سطحی وفد نے سکردو کا دورہ کیا۔ منصوبے کے پہلے مرحلے میں گلگت اور سکردو میں جدید آسان خدمت مراکز قائم کیے جائیں گے، جبکہ مستقبل میں اس ماڈل کو آزاد جموں و کشمیر تک توسیع دینے کا بھی امکان ہے۔دورے کے دوران وفد نے متعلقہ حکام کو آذربائیجان میں کامیابی سے نافذ کیے گئے ASAN Service Model پر تفصیلی بریفنگ دی۔ وفد نے کہا کہ وفاقی حکومت اسلام آباد کے آسان خدمت مرکز کے ماڈل کو گلگت بلتستان میں بھی متعارف کرانا چاہتی ہے تاکہ عوام کو جدید، مؤثر اور تیز رفتار عوامی خدمات فراہم کی جا سکیں۔ اس موقع پر گلگت بلتستان میں اس ماڈل کے نفاذ کے مختلف پہلوؤں پر بھی تبادلۂ خیال کیا گیا۔بریفنگ میں بتایا گیا کہ آسان خدمت مراکز کے قیام سے شہریوں کو مختلف سرکاری خدمات ایک ہی چھت تلے ون ونڈو نظام کے تحت دستیاب ہوں گی، جس سے خدمات کی فراہمی میں شفافیت اور تیزی آئے گی۔ مجوزہ مراکز میں جدید آئی ٹی انفراسٹرکچر، ڈیجیٹل سہولیات اور کیو مینجمنٹ سسٹم متعارف کرایا جائے گا تاکہ عوام کو معیاری اور سہل خدمات فراہم کی جا سکیں۔اس منصوبے کے تحت مختلف محکموں کے آن لائن سسٹمز کو ان مراکز کے ساتھ منسلک کیا جائے گا، جبکہ نادرا، نیشنل بینک، پاسپورٹ اور امیگریشن سمیت وفاقی اداروں کو بھی اپنے کاؤنٹرز قائم کرنے کی پیشکش کی جائے گی۔ وفد اپنے دورے کے دوران مجوزہ مراکز کے قیام کے لیے کیے گئے انتظامات، دستیاب سہولیات اور تکنیکی امور کا بھی جائزہ لے گا۔بریفنگ میں کمشنر بلتستان سمیت مختلف متعلقہ محکموں کے سربراہان اور اعلیٰ حکام شریک تھے۔
