پنجاب میں قبضہ مافیا اور پلاٹس فراڈ کرنیوالوں کیخلاف کڑی قانون سازی کی تیاریاں جاری ہیں۔وزیر ہاؤسنگ پنجاب بلال یاسین نے بورڈ آف ریونیو میں ہونیوالے اہم اجلاس کی صدارت کی۔ایس ایم بی آر نبیل جاوید، سیکرٹری ہاؤسنگ نورالامین مینگل، ڈی جی ایل ڈی اے طاہر فاروق، ڈی جی پی ایل آر اے اور دیگر افسران شریک تھے۔ پنجاب لینڈ ریکارڈ اتھارٹی ، صوبہ بھر میں ہاؤسنگ اسکیموں کی منظوری سے متعلقہ سافٹ ویئر تیار کرے گی۔ ڈیجیٹل ریونیو ریکارڈ ،این او سیز کی فراہمی سمیت دیگر امور 90 روز میں نمٹانے کا ہدف مقرر کیا گیا ہے۔غیر قانونی ہاؤسنگ اسکیموں اور جعلی فائل سسٹم کیخلاف عوامی شکایات کا تدارک کیا جائے گا۔اجلاس میں
غیر قانونی ہاؤسنگ اسکیموں کی تشہیر روکنے اور پراپرٹی ڈیلرز کو رجسٹرڈ کرنے بارے سفارشات کا جائزہ لیا گیا۔ قوانین کی خلاف ورزی کرنیوالوں کے اکاؤنٹس اور اثاثہ جات منجمد کیے جانے بارے بھی سفارشات پیش کی گئیں۔ صوبائی وزیر ہاؤسنگ بلال یاسین کا کہنا تھا کہ سیلابی پانی کی گذرگاہوں پر آبادکاری کی اجازت نہیں دی جائے گی۔ منظور شدہ اراضی سے کئی گناہ زیادہ پلاٹس فائل فروخت کرنیوالوں کو کسی صورت اجازت نہیں دی جا سکتی۔
انہوں نے واضح کیا کہ الاٹ شدہ اراضی کی اقساط ادائیگی کے بعد جگہ تبدیل کرنیوالی ہاؤسنگ اسکیموں کیخلاف ایکشن لیا جائے گا۔ جعلسازی ،دھوکہ دہی اور فراڈ میں ملوث عناصر اپنا قبلہ درست کرلیں۔ وزیر اعلیٰ مریم نواز کی ہدایت پر عوام کے حقوق کا تحفظ اولین ترجیحات میں شامل ہے۔ اجلاس میں محکمہ لوکل گورنمنٹ، فنانس، قانون،روڈا، کوآپریٹو، ماحولیات اور واسا کے افسران بھی شریک تھے۔
