”کراچی ورلڈ بک فیئر“جیسے علمی میلے فکری ہم آہنگی کو فروغ دیتے ہیں۔ ڈپٹی میئر کراچی سلمان عبداللہ مراد

ڈپٹی میئر کراچی سلمان عبداللہ مراد نے کہا ہے کہ مطالعہ، کتاب دوستی اور علم سے وابستگی کسی بھی زندہ اور ترقی یافتہ قوم کی بنیادی پہچان ہوتی ہے، کتاب انسان کو سوچنے، سمجھنے اور صحیح و غلط میں تمیز سکھاتی ہے جبکہ معاشروں کی فکری تعمیر میں کتاب کا کردار بنیادی حیثیت رکھتا ہے ۔ ان کا کہنا تھا کہ کتابیں صرف معلومات کا ذریعہ نہیں بلکہ اخلاق، برداشت، تہذیب اور شعور کی تربیت بھی کرتی ہیں، یہ بات انہوں نے ایکسپو سینٹر کراچی میں منعقدہ ”کراچی ورلڈ بک فیئر“ کا دورہ کرنے اوراطہر اقبال کی کتاب ”ایک کہاوت ایک کہانی“(جلد چہارم) کی تقریبِ رونمائی میں بطور مہمانِ خصوصی شرکت کرتے ہوئے کہی، اس موقع پر مصنف اطہر اقبال نے اپنی کتاب ”ایک کہاوت ایک کہانی)“مہمان خصوصی کو پیش کرتے ہوئے تقریب میں کتاب کی رونمائی کرائی، تقریب میں مختلف شعبہ جات سے تعلق رکھنے والی شخصیات نے شرکت کی اور اطہر اقبال کی نئی کتاب ”ایک کہاوت ایک کہانی“ کو بہت سراہا، تقریب کی صدارت معروف محقق، مصنف، سابق چیئرمین شعبہ صحافت جامعہ کراچی اور کراچی پریس کلب کی الیکشن کمیٹی کے چیئرمین ڈاکٹر توصیف احمد خان نے انجام دی، تقریب سے ممبر قومی اسمبلی احمد سلیم صدیقی، ڈاکٹر توصیف احمد خان، ڈاکٹر عقیل عباس جعفری، معروف شاعر اور کالم نگار یونس ہمدم، حنیف سحر، سہیل عابدی، کاوش صدیقی، محبوب الٰہی محمود، رضوان زیدی، سید منعم حسین اور صاحب کتاب اطہر اقبال نے بھی خطاب کیا، ڈپٹی میئر کراچی سلمان عبداللہ مراد نے مزید کہا کہ نئی نسل کو کتاب سے جوڑنا وقت کی اہم ترین ضرورت ہے کیونکہ سوشل میڈیا اور ڈیجیٹل دور میں مطالعے کی عادت کمزور ہو رہی ہے، جسے دوبارہ مضبوط بنانے کے لیے والدین، تعلیمی اداروں اور سماجی تنظیموں کو مشترکہ کردار ادا کرنا ہوگا، ڈپٹی میئر کراچی سلمان عبداللہ مراد نے کہا کہ کتاب دوستی نوجوانوں میں مثبت سوچ، تنقیدی شعور اور تعمیری کردار کو فروغ دیتی ہے، ڈپٹی میئر کراچی نے کراچی ورلڈ بک فیئر جیسے علمی میلوں کے انعقاد کو خوش آئند اور قابلِ تحسین قرار دیتے ہوئے کہا کہ ایسے ادبی اور علمی میلے معاشرے میں علم دوستی، مکالمے اور فکری ہم آہنگی کو فروغ دیتے ہیں۔ انہوں نے کہا کہ کراچی ہمیشہ سے علم، ادب، تحقیق اور تخلیق کا مرکز رہا ہے اور آج بھی یہ شہر ادبی سرگرمیوں کے ذریعے اپنی شناخت برقرار رکھے ہوئے ہے، انہوں نے مزید کہا کہ ادبی سرگرمیاں معاشرے میں مثبت سوچ، برداشت اور رواداری کو فروغ دیتی ہیں اور کتاب سے جڑا ہوا معاشرہ ہی امن، ترقی اور شعوری ارتقاء کی ضمانت ہوتا ہے۔ ڈپٹی میئر کراچی سلمان عبداللہ مراد نے یقین دلایا کہ بلدیہ عظمیٰ کراچی علم و ادب کے فروغ، کتاب میلوں اور مطالعے سے متعلق تمام مثبت سرگرمیوں کی حوصلہ افزائی کرتی رہے گی تاکہ کراچی کو ایک باعلم اور باشعور شہر بنایا جا سکے، انہوں نے مصنف اطہر اقبال کی ادبی خدمات کو سراہا اور نئی کتاب کی اشاعت پر مبارک باد پیش کی۔