وزیراعلیٰ پنجاب مریم نوازشریف کی زیر صدارت خصوصی اجلاس منعقد ہوا جس میں سیلاب متاثرین کے نقصان کا ازالہ کرنے کیلئے اہم فیصلے کیے گئے۔ اجلاس میں پنجاب میں سیلاب متاثرین بحالی آپریشن شروع کرنے کا فیصلہ کیا گیا۔ اس موقع پر ڈسٹرکٹ اورتحصیل کی سطح پر فلڈ ریلیف کمیٹیاں قائم کرنے پر بھی غور کیا گیا۔ وزیراعلیٰ مریم نوازشریف نے سیلاب متاثرین کی امداد کیلئے آسان ترین طریقے کار وضع کرنے کی ہدایت کی۔ اجلاس میں سیلاب متاثرین کیلئے سروے فارم،موبائل ایپ اورمانیٹرنگ ڈیش بورڈ قائم کرنے پر اتفاق کیا گیا۔ وزیراعلیٰ مریم نوازشریف ڈیش بورڈ پر خود سیلاب متاثرین کی امدادکی مانیٹرنگ کریں گی۔ وزیراعلیٰ مریم نوازشریف نے سیلاب متاثرہ علاقوں میں سڑکوں،پلوں اورانفراسٹرکچر کی فوری بحالی کا حکم دیا۔ وزیراعلیٰ مریم نواز شریف کو ریونیوڈیپارٹمنٹ کے حکام نے تفصیلی بریفنگ دی۔ بریفنگ میں بتایا گیا کہ پنجاب کے 27اضلاع،64تحصیل میں 3775موضع سیلاب سے متاثر ہوئے۔سیلاب سے 63200پکے اور309684کچے مکانا ت متاثر ہوئے۔سیلاب متاثرین کے سروے کیلئے ٹیم میں اربن یونٹ،ریونیو،زراعت اورآرمی کے نمائندے شامل ہوں گے۔وزیراعلیٰ مریم نواز شریف نے کہا کہ حکومت سیلاب متاثرین کی 
بھر پورامداد کیلئے یکسو ہے۔حکومت کو سیلاب متاثرین تک خود پہنچنا چاہیے۔سیلاب متاثرین کو امداد کی ترسیل کیلئے زیادہ کیمپ اورپوائنٹس قائم کیے جائیں۔وزیراعلیٰ مریم نواز شریف نے کہا کہ دل کھول کر سیلاب متاثرین کی مدد کرنی ہے۔ہر فرد کے نقصان کا ازالہ کریں گے تاکہ کوئی ریلیف سے محروم نہ رہے۔
