میئر کراچی بیرسٹر مرتضیٰ وہاب نے آج ہم ایک صدی مکمل کرنے والی تاریخی حسن علی حوتی مارکیٹ میں موجود ہیں، یہ صرف ایک تجارتی مرکز نہیں بلکہ کراچی کے قدیم تشخص اور برطانوی دور کے شہری ورثے کی علامت ہے، سو سال قبل قائم کی جانے والی اس تاریخی مارکیٹ کو وقت گزرنے کے ساتھ نظرانداز کیا گیا، تجاوزات قائم ہو گئیں اور اس کا اصل حسن ماند پڑ گیا، تاہم بلدیہ عظمیٰ کراچی نے اس تاریخی ورثے کو بچانے کا بیڑہ اٹھایا، ہم نے اس مارکیٹ کی تزئین و آرائش اس انداز سے کی ہے کہ اس کا اصل تشخص برقرار رہے، چبوترے ختم کیے گئے، تجاوزات کا خاتمہ کیا گیا اور جدید سہولیات فراہم کی گئیں تاکہ تاجر برادری کو بہتر ماحول مل سکے، قدیم ورثے کی بحالی شہری ترقی کا اہم حصہ ہے، تاریخی بازاروں کی بحالی سے نہ صرف کراچی کی خوبصورتی میں اضافہ ہوتا ہے بلکہ کاروباری سرگرمیوں کو بھی فروغ ملتا ہے۔
حسن علی حوتی مارکیٹ کی بحالی اسی وژن کی عکاس ہے، ان خیالات کا اظہار انہوں نے اولڈ سٹی ایریا رنچھوڑ لائن میں واقع تاریخی حسن علی حوتی مارکیٹ کے 100 سال مکمل ہونے پر تزئین و آرائش اور بحالی کے بعد باقاعدہ افتتاح کرنے کے موقع پر کیا، اس موقع پر صوبائی وزیر ثقافت ذوالفقار شاہ، منتخب نمائندے، تاجر برادری، ہوتھی خاندان کے افراد اور بلدیہ عظمیٰ کراچی کے افسران بھی موجود تھے، میئر کراچی نے کہا کہ کراچی ایک کثیر الثقافتی شہر ہے جہاں ہر رنگ، نسل اور مذہب کے لوگ بستے ہیں، اور یہ تاریخی بازار اسی ہم آہنگی کی علامت ہیں، انہوں نے کہا کہ ڈینسو ہال اور فریئر ہال کو بحال کیا جا چکا ہے، ایمپریس مارکیٹ پر کام جاری ہے، کے ایم سی بلڈنگ کی بحالی ہو رہی ہے، لی مارکیٹ پر کام شروع ہو چکا ہے جبکہ مچھی میانی مارکیٹ کی بحالی کا بھی جلد آغاز کیا جائے گا، انہوں نے کہا کہ اس سال انشاء اللہ کراچی پر 46 ارب روپے خرچ کیے جائیں گے، پانی کے مسائل کے حل کے لیے کے فور، حب کینال اور دیگر منصوبوں پر کام جاری ہے، ماڑی پور میں 54 ایم جی ڈی پانی ٹریٹ کیا جا رہا ہے جبکہ ٹی پی ون کے پہلے فیز میں 20 ایم جی ڈی پانی ٹریٹ ہوگا۔میئر کراچی نے کہا کہ شہر میں نئی بسیں آ رہی ہیں، ترقیاتی کام اگلے ڈیڑھ سال میں واضح طور پر نظر آئیں گے، اور پاکستان پیپلز پارٹی کی قیادت، چیئرمین بلاول بھٹو زرداری، وزیراعلیٰ سندھ اور صوبائی وزراء کی رہنمائی میں کراچی کی ترقی کا سفر جاری رہے گا، اس موقع پرصوبائی وزیر ثقافت ذوالفقار شاہ نے تقریب سے خطاب کرتے ہوئے کہا کہ میں میئر کراچی بیرسٹر مرتضیٰ وہاب کا شکریہ ادا کرتا ہوں کہ انہوں نے حسن علی حوتی مارکیٹ جیسے تاریخی ورثے کی بحالی کو ممکن بنایا، ہیریٹیج ڈیپارٹمنٹ کے ساتھ مل کر انتہائی بہتر انداز میں کام کیا گیا ہے، انہوں نے کہا کہ ایمپریس مارکیٹ، فریئر ہال اور دیگر تاریخی عمارتوں پر بھی کام ہو رہا ہے اور یہ تمام منصوبے سندھ کے ثقافتی ورثے کے تحفظ کی واضح مثال ہیں، میں بلدیہ عظمیٰ کراچی کی پوری ٹیم کو خراج تحسین پیش کرتا ہوں، تقریب کے اختتام پر میئر کراچی نے کہا کہ حسن علی حوتی مارکیٹ کی بحالی نہ صرف تاجر برادری بلکہ آنے والی نسلوں کے لیے بھی ایک تحفہ ہے، اور تاریخی کراچی کو اس کی اصل پہچان کے ساتھ دنیا کے سامنے لانا ہی بلدیہ عظمیٰ کراچی کا مشن ہے۔
