اجلاس میں وزیرِ بلدیات و اعلیٰ تعلیم مینا خان آفریدی، وزیرِ پبلک ہیلتھ انجینئرنگ فضل شکور خان، مشیرِ خزانہ مزمل اسلم، ایڈووکیٹ جنرل خیبرپختونخوا شاہ فیصل اتمان خیل، سیکرٹری محکمہ صحت شاہد اللہ خان سمیت دیگر متعلقہ محکموں کے اعلیٰ حکام نے شرکت کی۔اجلاس میں پیپلز پرائمری ہیلتھ کیئر انیشی ایٹو (PPHI) کے کنٹریکٹ ملازمین کی مستقلی سے متعلق سپریم کورٹ آف پاکستان کے 5 دسمبر 2024 کے فیصلے اور رائج قوانین و پالیسیوں کا تفصیلی جائزہ لیا گیا۔ عدالتی فیصلے کی روشنی میں قانونی و انتظامی پہلوؤں پر غور کرتے ہوئے حتمی سفارشات تیار کرنے پر مشاورت کی گئی۔محکمہ صحت خیبرپختونخوا کی جانب سے اجلاس کے دوران سپریم کورٹ کے فیصلے کا باریک بینی سے تجزیہ پیش کیا گیا اور پالیسی و قواعد و ضوابط کے تناظر میں ملازمین کی مستقلی سے متعلق مختلف تجاویز پر غور کیا گیا۔ اس موقع پر متعلقہ افسران نے پریزنٹیشنز اور ورکنگ پیپرز کے ذریعے کمیٹی کو تفصیلی بریفنگ بھی دی۔
