ضلعی انتظامیہ لاہور نے ڈپٹی کمشنر لاہور کیپٹن (ر) محمد علی اعجاز کی متحرک قیادت میں شہر بھر میں گرانفروشی اور ناقص اشیاء کی فروخت کے خلاف اپنی مہم مزید تیز کر دی ہے، جس کا مقصد شہریوں کو معیاری اشیاء خورونوش کی مقررہ نرخوں پر فراہمی یقینی بنانا ہے۔ اسی سلسلے میں ڈی سی لاہور کی خصوصی ہدایت پر کارروائی کرتے ہوئے اسسٹنٹ کمشنر صدر ڈاکٹر عابد ممتاز خان سیال نے بیدیاں روڈ کا تفصیلی دورہ کیا اور وہاں موجود گوشت کی دکانوں سمیت مختلف سپر مارٹس کا باریک بینی سے جائزہ لیا۔ دورے کے دوران اے سی صدر نے ڈی سی کاؤنٹرز پر اشیاء کے معیار، دستیابی اور سرکاری ریٹ لسٹوں کی موجودگی کو چیک کیا۔ معائنے کے دوران کئی مقامات پر ریٹ لسٹیں آویزاں نہ کرنے اور ناقص اشیاء کی فروخت کے شواہد ملنے پر سخت ایکشن لیتے ہوئے مجموعی طور پر 25 ہزار روپے کے جرمانے عائد کیے گئے۔ اس موقع پر ڈپٹی کمشنر لاہور کیپٹن (ر) محمد علی اعجاز نے واضح پیغام دیا ہے کہ گرانفروشی اور ناقص اشیاء فروخت کر کے شہریوں کا استحصال کرنے والوں کے خلاف بلا تفریق کارروائی جاری رہے گی اور اس معاملے میں کسی قسم کی رعایت نہیں برتی جائے گی۔ انہوں نے مزید کہا کہ ضلعی انتظامیہ لاہور کا فیلڈ عملہ روزانہ کی بنیاد پر مارکیٹوں کی مانیٹرنگ کر رہا ہے تاکہ عوام کو ریلیف فراہم کیا جا سکے۔
ڈی سی لاہور کیپٹن (ر) محمد علی اعجاز کی ہدایت پر گرانفروشوں اور ناقص اشیاء فروخت کرنے والوں کے خلاف بڑا کریک ڈاؤن
