بلدیہ عظمیٰ کراچی کے زیر انتظام شہر میں نماز عید الفطر کا سب سے بڑا اجتماع گلشن جناح(پولو گراؤنڈ) میں منعقد کیا جائے گا جس کے لئے انتظامات شروع کردیئے گئے ہیں، بلدیہ عظمیٰ کراچی کے ترجمان دانیال سیال کے مطابق اس سال عید الفطر کی نماز کے لئے بڑے پیمانے پر انتظامات کئے جارہے ہیں، توقع ہے کہ گورنر سندھ نہال ہاشمی، میئر کراچی بیرسٹر مرتضیٰ وہاب، ڈپٹی میئر کراچی سلمان عبداللہ مراد، مختلف اسلامی ملکوں کے سفارتکار، موجودہ اور سابق وفاقی و صوبائی وزراء، ممبران قومی و صوبائی اسمبلی، میونسپل کمشنر کراچی، صوبائی سیکریٹریز، سٹی کونسل کے اراکین، مختلف سیاسی و سماجی تنظیموں کے رہنماء اور معززین شہر کی ایک بڑی تعداد پولو گراؤنڈ میں نماز عید ادا کرے گی، اس موقع پر عید گاہ میں اسلامی ملکوں کے پرچم لہرائے جائیں گے، نمازیوں کے لئے وضو کا انتظام کیا جائے گا، خوشبو کا اسپرے ہوگا اور صفائی ستھرائی اور سیکورٹی سے متعلق خصوصی انتظامات کئے جائیں گے، عید کے دن مرکزی دروازے کے سامنے شہریوں کو خوش آمدید کہنے کے لئے پھولوں سے مزین گیٹ بھی بنایا جائے گا، پولو گراؤنڈ میں نماز عیدالفطر کا یہ اجتماع 1958 سے منعقد کیا جارہا ہے۔
