وزیر بلدیات ذیشان رفیق کی سُتھرا پنجاب کے ورکرز سمیت تمام مسیحیوں کو ایسٹر کی مبارکباد

وزیر بلدیات ذیشان رفیق نے ایسٹر کے مبارک موقع پر سُتھرا پنجاب کے ورکرز سمیت تمام مسیحیوں کو دلی مبارکباد پیش کی ہے۔ اپنے ایک تہنیتی پیغام میں انہوں نے کہا کہ مسیحی عقیدے کے مطابق روزوں کے اختتام پر ایسٹر بلاشبہ خوشی اور مسرت کا تہوار ہے۔ مسلمان اپنے مسیحی بہن بھائیوں کی خوشیوں میں برابر کے شریک ہیں۔ ذیشان رفیق نے کہا کہ مسیحی برادری ملکی ترقی و استحکام کیلئے اپنا بھرپور کردار ادا کر رہی ہے اور آئینِ پاکستان اقلیتوں کے حقوق کی مکمل ضمانت دیتا ہے۔ آج کے دن ہمیں اس عزم کا اعادہ کرنا ہوگا کہ ہم بین العقائد ہم آہنگی میں اضافے کے لئے اپنی تمام تر توانائیاں بروئے کار لائیں گے۔ انہوں نے اپیل کی کہ پادری صاحبان ایسٹر کی عبادت کے دوران پاکستان کی خوشحالی اور خطے میں امن کیلئے خصوصی دعائیں کریں۔ صوبائی وزیر نے سُتھرا پنجاب اتھارٹی کو مسیحی ملازمین میں ایسٹر کے تحائف تقسیم کرنے کی ہدایت کرتے ہوئے زور دیا کہ تمام میونسپل چیف آفیسرز تفریحی پارکوں میں سہولیات کی فراہمی یقینی بنائیں۔ ضلع انتظامیہ کے افسران ایسٹر کیلئے لگائے گئے جُھولوں کی فٹنس لازمی چیک کریں تاکہ کسی بھی ناخوشگوار واقعے سے بچا جاسکے۔