اینٹی کرپشن اسٹیبلشمنٹ گلگت بلتستان نے آج محکمہ معدنیات کے ساتھ مشترکہ کارروائی کرتے ہوئے غیر قانونی گولڈ مائننگ میں ملوث افراد کو گرفتار کر لیا۔محکمہ اینٹی کرپشن کی سربراہی میں کی گئی اس کارروائی کے دوران تھلچی کے مقام پر جاری غیر قانونی سرگرمی کو فوری طور پر بند کر دیا گیا۔ ذرائع کے مطابق اس غیر قانونی عمل سے کروڑوں روپے کی آمدن حاصل کی جا رہی تھی جبکہ سرکاری خزانے کو بھاری نقصان پہنچ رہا تھا۔مزید برآں، تھلچی میں قائم وہ پٹرول پمپ بھی سیل کر دیا گیا جو مبینہ طور پر مشینری کو ایندھن فراہم کر رہا تھا، جبکہ پیدن میں قائم چائنیز کیمپ کو بھی سیل کر دیا گیا۔کارروائی کے دوران یہ انکشاف بھی سامنے آیا کہ بعض انتظامی عناصر مبینہ طور پر اس غیر قانونی سرگرمی میں شریک تھے۔اس اہم کارروائی کے دوران دیامر انتظامیہ کو بھی شامل رکھا گیا۔اینٹی کرپشن اسٹیبلشمنٹ کے ذرائع کے مطابق اس معاملے میں ملوث مزید کرداروں کو جلد قانون کے کٹہرے میں لایا جائے گا۔
