وزیر بلدیات پنجاب ذیشان رفیق نے کہا ہے کہ پاکستان مسلم لیگ ن مقامی حکومتوں کی مضبوطی پر یقین رکھتی ہے۔ الیکشن کمیشن اپنا کام کر رہا ہے، جلد از جلد بلدیاتی انتخابات کرا دیں گے۔ صوبائی وزیر مقامی حکومتوں کے انتخابات پر گول میز کانفرنس سے بطور مہمان خصوصی خطاب کر رہے تھے۔
ایم پی اے، چیئرمین پنجاب لینڈ ریکارڈ اتھارٹی طارق سبحانی نے بھی کانفرنس میں شرکت کی۔وزیر بلدیات ذیشان رفیق نے کہا کہ وزیراعلیٰ مریم نواز شریف نے اقتدار سنبھالتے ہی لوکل گورنمنٹ ایکٹ کی تیاری کیلئے کمیٹی بنائی جس نے مسودہ قانون کی تیاری کے لئے مسلسل کام کیا۔ یہ ایک حقیقت ہے کہ پنجاب میں سب سے زیادہ الیکشن مسلم لیگ ن کی حکومتوں میں کرائے گئے۔ بدقستمی سے نہ صرف 2018 میں 58 ہزار بلدیاتی نمائندوں کو ایک نوٹیفیکیشن کے ذریعے چلتا کر دیا گیا بلکہ سپریم کورٹ کے فیصلے کے بعد بھی بلدیاتی نظام کو بحال نہ کیا گیا۔ ذیشان رفیق نے کہا کہ میاں محمد شہباز شریف جب پنجاب کے وزیراعلیٰ تھے تو اُن کے دور میں چلتے بلدیاتی اداروں کو گھر نہیں بھیجا گیا۔ انہوں نے کہا کہ چلتے بلدیاتی نظام کو ڈسٹرب نہ کرنا مسلم لیگ ن کی پالیسی ہے۔ وزیر بلدیات پنجاب نے کہا کہ میں نے ہر فورم پر یقین دلایا کہ جو ایکٹ بنایا ہے اُس کے مطابق الیکشن کرا دیں گے۔ ہم نے کوئی لمحہ ضائع کئے بغیر بلدیاتی انتخابات کے لئے کام جاری رکھا۔ الحمدللہ اب الیکشن ایکٹ بن چکا ہے۔ محکمہ بلدیات نے حد بندی کا عمل مقررہ وقت کے اندر مکمل کیا۔ انہوں نے کہا کہ اس پورے عمل میں آپ کو کوئی تاخیر نظر نہیں آئے گی۔ انشااللہ الیکشن کمیشن آف پاکستان کی ہدایت کے مطابق آئندہ بھی تاخیر نہیں ہوگی۔
