وفاقی حکومت کے عوامی فلاحی اور صحت کے انقلابی منصوبوں کے تحت بلتستان ڈویژن کے عوام کے لیے ایک بڑی خوشخبری ، سکردو میں زیرِ تعمیر 250 بستروں (Beds) پر مشتمل جدید ترین ہسپتال کا منصوبہ تیزی سے تکمیل کے مراحل میں داخل ہو چکا ہے۔اس سلسلے میں سیکرٹری صحت گلگت بلتستان، آصف اللہ خان نے سکردو کا تفصیلی دورہ کیا اور زیرِ تعمیر ہسپتال کے منصوبے پر جاری ترقیاتی کاموں کا باریک بینی سے جائزہ لیا۔ دورے کے دوران متعلقہ حکام، نگران انجینئرز اور ٹھیکیداروں نے سیکرٹری صحت کو بریفنگ دی اور کام کی رفتار اور معیار کے بارے میں تفصیلی آگاہ کیا۔میڈیا سے گفتگو اور موقع پر موجود افسران کو ہدایات دیتے ہوئے سیکرٹری صحت آصف اللہ خان نے کہا کہ یہ عظیم الشان منصوبہ بلتستان کے عوام کے لیے صحت کی سہولیات میں ایک سنگِ میل ثابت ہوگا۔ ہماری بھرپور کوشش ہے کہ رواں مالی سال کے اندر ہسپتال کے پینل نمبر 1 سے لے کر پینل نمبر 5 تک کے تمام تعمیراتی اور تکنیکی مراحل مکمل ہو سکیں ۔انہوں نے مزید کہا کہ حکومت صحت کے شعبے میں کسی قسم کا سمجھوتہ نہیں کرے گی۔ انہوں نے متعلقہ حکام کو سخت ہدایات جاری کیں کہ کام کی رفتار کو مزید تیز کیا جائے اور مٹیریل کے معیار پر خصوصی توجہ دی جائے تاکہ مقررہ وقت کے اندر یہ منصوبہ بلتستان کے غیور عوام کے سپرد کیا جا سکے۔اس 250 بستروں کے ہسپتال کی فعال ہونے سے نہ صرف سکردو بلکہ گردونواح کے اضلاع کے لاکھوں لوگوں کو ان کی دہلیز پر جدید ترین طبی سہولیات، ایمرجنسی سروسز اور ماہر ڈاکٹروں کی خدمات میسر آئیں گی، جس سے مقامی مریضوں کو علاج کے لیے دیگر بڑے شہروں کا رخ نہیں کرنا پڑے گا۔
سکردو میں 250 بستروں پر مشتمل سٹیٹ آف دی آرٹ ہسپتال کا تعمیراتی کام آخری مراحل میں داخل،سیکرٹری صحت آصف اللہ خان
