وزیراعلیٰ پنجاب مریم نواز شریف کے "پولیو فری” وژن اور صوبے کو پولیو جیسی موذی بیماری سے مکمل طور پر پاک کرنے کے پختہ عزم کی روشنی میں ضلعی انتظامیہ لاہور نے شہر بھر میں سات روزہ انسدادِ پولیو مہم کا بھرپور آغاز کر دیا ہے تاکہ ہر بچے کو عمر بھر کی معذوری سے بچایا جا سکے۔ اسی سلسلے میں ڈپٹی کمشنر لاہور کیپٹن (ر) محمد علی اعجاز نے میاں میر ٹی ایچ کیو ہسپتال کا دورہ کیا جہاں انہوں نے پولیو سے بچاؤ کے حفاظتی قطرے پلا کر اس مہم کا باقاعدہ افتتاح کیا جبکہ اس موقع پر سی ای او ہیلتھ ڈاکٹر آصف ارباب خان نیازی نے ان کا پرتپاک استقبال کیا اور مہم پر تفصیلی بریفنگ دی۔ افتتاحی تقریب کے دوران ڈپٹی کمشنر لاہور نے مہم کی کامیابی اور لاہور کو پولیو فری بنانے کے لیے خصوصی دعا بھی کی جبکہ مہم کو پرکشش بنانے کے لیے بچوں میں تحائف اور مٹھائیاں بھی تقسیم کی گئیں تاکہ ویکسی نیشن کے عمل کو عوامی سطح پر خوش آئند بنایا جا سکے۔ ضلعی انتظامیہ کی فعال حکمت عملی کے تحت لاہور کی تمام 274 یونین کونسلز میں مہم بیک وقت شروع کر دی گئی ہے جس کا بنیادی ہدف 22 لاکھ 85 ہزار سے زائد بچوں کو اورل پولیو ویکسین (OPV) فراہم کرنا ہے اور اس مقصد کے لیے 14,000 سے زائد موبائل پولیو ٹیمیں فیلڈ میں متحرک کر دی گئی ہیں جو گھر گھر جا کر پانچ سال تک کی عمر کے بچوں کی حاضری یقینی بنا رہی ہیں۔ مہم کی حساسیت کے پیشِ نظر تمام پولیو ٹیموں کے ہمراہ سیکیورٹی اہلکار بھی تعینات کیے گئے ہیں تاکہ کسی بھی ناخوشگوار واقعے سے بچتے ہوئے فول پروف انتظامات کے تحت مہم کو پایہ تکمیل تک پہنچایا جا سکے جبکہ تمام ہسپتالوں، داخلی و خارجی راستوں اور ٹرانزٹ پوائنٹس پر بھی خصوصی ٹیمیں الرٹ رکھی گئی ہیں۔ ڈپٹی کمشنر لاہور نے تمام 274 یو سی ایم اوز (UCMOs) اور ڈی ڈی ایچ اوز (DDHOs) کو مہم کی براہِ راست نگرانی کی سخت ہدایت جاری کرتے ہوئے واضح کیا ہے کہ کوئی بھی گھر پولیو قطرے پلائے بغیر ہرگز نہیں چھوٹنا چاہیے اور انکاری والدین کو قائل کرنے کے لیے عوامی نمائندوں کے تعاون سے موثر کمیونٹی انگیجمنٹ کو یقینی بنایا جائے۔ انہوں نے فیلڈ ٹیموں کو پابند کیا ہے کہ وہ انکاری کیسز اور مجموعی مہم کی پیشرفت رپورٹ روزانہ کی بنیاد پر ڈی سی آفس ارسال کریں تاکہ مہم کے معیار کو جانچا جا سکے کیونکہ پولیو ایک لا علاج اور مفلوج کر دینے والی بیماری ہے جس کا واحد حل صرف حفاظتی قطرے ہی ہیں۔ کیپٹن (ر) محمد علی اعجاز نے واضح کیا کہ لاہور کو پولیو سے پاک بنانا ہماری اولین ترجیح اور قومی فریضہ ہے جس کے لیے انتظامیہ کسی بھی سطح پر تساہل یا غفلت برداشت نہیں کرے گی اور تمام وسائل بروئے کار لائے جائیں گے۔ انہوں نے والدین سے بھی دردمندانہ اپیل کی ہے کہ وہ اپنی آنے والی نسل کو مستقل معذوری کے اندھیرے سے نکالنے کے لیے سرکاری ٹیموں کے ساتھ بھرپور تعاون کریں کیونکہ بچوں کا محفوظ مستقبل ہی درحقیقت پاکستان کی مضبوطی کی ضمانت ہے۔
پولیو سے پاک محفوظ لاہور ،ڈپٹی کمشنر کا سات روزہ انسدادِ پولیو مہم کا باقاعدہ افتتاح
