میئر کراچی بیرسٹر مرتضیٰ وہاب نے کراچی میں چین کے قونصل جنرل یانگ یونڈونگ (Yang Yundong) سے الوداعی ملاقات کی، اس موقع پر میئر کراچی نے قونصل جنرل کو بلدیہ عظمیٰ کراچی آمد پر خوش آمدید کہا اور پاکستان اور چین کے درمیان دیرینہ دوستی اور برادرانہ تعلقات کو سراہا، میئرکراچی بیرسٹر مرتضیٰ وہاب نے کہا کہ پاک چین دوستی لازوال اور مضبوط ہے اور دونوں ممالک کے درمیان موجود اس مثالی تعلق کو مزید مستحکم بنانے کے لیے مشترکہ کوششیں جاری رہیں گی، انہوں نے کہا کہ کراچی کی شہری حکومت کی بہتری اور ترقی میں چین کا کردار ہمیشہ مثبت اور قابلِ قدر رہا ہے،میئر کراچی نے قونصل جنرل یانگ یونڈونگ کی خدمات کو خراجِ تحسین پیش کرتے ہوئے کہا کہ پاکستان بالخصوص کراچی کے لیے ان کی محبت، تعاون اور خدمات کو ہمیشہ یاد رکھا جائے گا، انہوں نے کہا کہ گزشتہ دس برسوں کے دوران کراچی میں امن و امان کی صورتحال میں نمایاں بہتری آئی ہے جس کے باعث سرمایہ کاری اور ترقی کے مزید مواقع پیدا ہوئے ہیں، اس موقع پر چین کے قونصل جنرل یانگ یونڈونگ نے کہا کہ کراچی روشنیوں، محبت اور مہمان نوازی کا شہر ہے اور یہاں کے عوام سے ملنے والی محبت اور خلوص کو وہ ہمیشہ یاد رکھیں گے، ملاقات میں پاک چین تعلقات، کراچی کی ترقی اور باہمی تعاون کے مختلف امور پر بھی تبادلہ خیال کیا گیا۔
