ڈپٹی میئر کراچی سلمان عبداللہ مراد سے سندھ بھر کی مختلف اقلیتی برادریوں کے نمائندوں پر مشتمل ایک وفد نے ملاقات کی، وفد میں بشارت مسیح، اشوک شرما، سنیل شتروگن ایڈوکیٹ، پووان نیشنل کمیشن فارم ہیومن رائٹس اور دیگر بھی شامل تھے،ملاقات کے دوران وفد نے اقلیتی برادریوں کو درپیش مختلف مسائل اور ان کے حل سے متعلق امور پر تفصیلی تبادلہ خیال کیا، وفد نے اقلیتی برادریوں کے مسائل پر مؤثر عملدرآمد، تعلیمی اداروں میں مختص کوٹے کی فراہمی اور حقِ معلومات (آر ٹی آئی) سے متعلق مسائل کو اجاگر کیا۔ اس موقع پر اقلیتی برادریوں کی فلاح و بہبود اور انہیں درپیش چیلنجز کے حل کے لیے مختلف تجاویز بھی پیش کی گئیں۔ ڈپٹی میئر کراچی سلمان عبداللہ مراد نے وفد کے مؤقف کو غور سے سنا اور یقین دہانی کرائی کہ اقلیتی برادریوں کے جائز مسائل کو متعلقہ فورمز پر اٹھایا جائے گا اور ان کے حل کے لیے ہر ممکن تعاون کیا جائے گا۔ انہوں نے کہا کہ تمام شہریوں کو بلاامتیاز مساوی حقوق اور ترقی کے یکساں مواقع فراہم کرنا بلدیاتی قیادت کی ترجیحات میں شامل ہے۔
ڈپٹی میئر کراچی سلمان عبداللہ مراد سے سندھ بھر کی مختلف اقلیتی برادریوں کے نمائندوں پر مشتمل وفد کی ملاقات
