سپیکر گلگت بلتستان اسمبلی عمران ندیم نے نیشنل ڈیزاسٹر رسک مینجمنٹ فنڈ (این ڈی آر ایم ایف) کے چیف ایگزیکٹو آفیسر امیر خان گورایا، کمپنی سیکرٹری محمد مہران افضل اور ہیڈ آف پراجیکٹس اینڈ آپریشنز احسن اللہ کنڈی سے ملاقات کی۔ملاقات میں گلگت بلتستان میں موسمیاتی تبدیلیوں کے بڑھتے ہوئے اثرات، سیلاب، لینڈ سلائیڈنگ، گلیشیئرز کے پگھلاؤ اور دیگر قدرتی آفات سے ہونے والے نقصانات اور ان میں کمی لانے کے لیے مؤثر اقدامات پر تفصیلی تبادلہ خیال کیا گیا۔سپیکر عمران ندیم نے کہا کہ گلگت بلتستان کا حساس پہاڑی جغرافیہ موسمیاتی تبدیلیوں سے زیادہ متاثر ہو رہا ہے، جس کے باعث انسانی جانوں، انفراسٹرکچر، زراعت اور مقامی معیشت کو سنگین خطرات لاحق ہیں۔ انہوں نے قدرتی آفات کے خطرات میں کمی، بروقت پیشگی اطلاع کے نظام اور موسمیاتی تبدیلیوں کے مقابلے کی صلاحیت رکھنے والے انفراسٹرکچر کی ترقی پر زور دیا۔این ڈی آر ایم ایف حکام نے گلگت بلتستان میں موسمیاتی خطرات اور قدرتی آفات سے ہونے والے نقصانات کو کم کرنے کے لیے تعاون جاری رکھنے اور مؤثر منصوبوں کی معاونت کے عزم کا اظہار کیا۔ملاقات میں گلگت بلتستان کے لیے نئے منصوبوں کی نشاندہی، موجودہ اقدامات کو مزید مؤثر بنانے اور متعلقہ اداروں کے درمیان تعاون بڑھانے پر بھی اتفاق کیا گیا۔
سپیکر گلگت بلتستان اسمبلی کی این ڈی آر ایم ایف حکام سے ملاقات، موسمیاتی تبدیلی کے اثرات پر تبادلہ خیال
