پشاور صدر کی شفیع مارکیٹ میں تجاوزات کے خلاف گرینڈ آپریشن؛ متعدد گرفتاریاں، سامان ضبط

صوبائی حکومت کی ہدایات پر کمشنر پشاور ڈویژن کیپٹن (ر) خالد محمود کی زیرِ قیادت تجاوزات کے خلاف جاری مہم کے سلسلے میں پشاور صدر کی مصروف ترین شفیع مارکیٹ میں گرینڈ آپریشن کیا گیا۔پشاور کی ضلعی انتظامیہ اور پشاور کنٹونمنٹ بورڈ کی مشترکہ کارروائی کے دوران دکانوں کے باہر قائم عارضی تجاوزات ختم کر دی گئیں، متعدد افراد کو گرفتار کیا گیا جبکہ دکانوں کے باہر رکھا گیا سامان ضبط کر لیا گیا۔کمشنر پشاور ڈویژن کیپٹن (ر) خالد محمود نے واضح کیا ہے کہ عوامی راستوں، فٹ پاتھوں اور بازاروں میں عارضی تجاوزات قائم کرکے ٹریفک کی روانی متاثر کرنے اور پیدل چلنے والوں کے لیے مشکلات پیدا کرنے والوں کے خلاف سخت کارروائی جاری رہے گی۔ تجاوزات قائم کرنے والوں کو کم از کم ایک لاکھ روپے جرمانے اور جیل کی سزا دی جائے گی۔انہوں نے ہدایت کی کہ بازاروں اور تجارتی مراکز میں تجاوزات کے خاتمے کے لیے کارروائیاں بلاامتیاز جاری رکھی جائیں اور شہریوں کی آمدورفت میں رکاوٹ بننے والے عناصر کے خلاف سخت قانونی کارروائی عمل میں لائی جائے۔پشاور میں تجاوزات کے خاتمے کی مہم بلا تعطل جاری ہے؛ عوامی راستوں پر قبضہ کسی صورت برداشت نہیں کیا جائے گا۔

جواب دیں

Back to top button