وزیراعلی مریم نواز شریف کی ہدایت پر وزیر بلدیات ذیشان رفیق نے ننکانہ صاحب کا دورہ کر کے صفائی کی صورتحال کا معائنہ کیا۔ وزیراعلی کے فوکل پرسن برئے سُتھرا پنجاب عاصم محمود بھی صوبائی وزیر کے ہمراہ تھے۔ وزیر بلدیات نے ننکانہ صاحب کی نواحی آبادیوں میں گھروں کے دروازے پر دستک دے کر شہریوں سے فیڈبیک لیا۔ انہوں نے شہریوں کی تجاویز پر صوبائی وزیر کی ایم ڈی ننکانہ صاحب کو عملدرآمد کی ہدایت کی۔ اپنے دورے میں صوبائی وزیر ڈپٹی کمشنر آفس بھی گئے جہاں انہیں صفائی آپریشنز پر بریفنگ دی گئی۔وزیر بلدیات ذیشان رفیق نے کہا کہ پنجاب حکومت کی جانب سے ہر ضلع میں اے ڈی سی (سالڈ ویسٹ) لگانے سے انتظامی معاملات میں بہتری آئی ہے۔ انہوں نے زور دیا کہ خالی پلاٹوں اور ریلوے ٹریکس کے ساتھ علاقوں کو نظرانداز نہ کیا جائے۔ انہوں نے اس بات پر اطمینان کا اظہار کیا کہ ننکانہ صاحب ان اضلاع میں شامل ہے جہاں ستھرا پنجاب کے لوڈر رکشہ پر میگافون سے اعلانات کے ذریعے ڈور ٹو ڈور ویسٹ کولیکشن شروع ہوچکی ہے۔ انہوں نے اپیل کی کہ شہری مقررہ وقت پر کوڑا سُتھرا پنجاب کی ٹیم کے حوالے کریں اور مقررہ وقت کے بعد گلیوں یا مارکیٹوں میں کوڑا پھینکنے سے گریز کرنا چاہیئے۔
