ای کچہری میں شہریوں کی شکایات براہِ راست سنیں،میئر کراچی کے فوری ازالے کے احکامات

میئر کراچی بیرسٹر مرتضیٰ وہاب نے شہریوں کو بلدیاتی مسائل کے حل کے لیے براہِ راست رسائی فراہم کرنے کے سلسلے میں دوسری ای کچہری کا انعقاد کیا، جس میں شہر کے مختلف علاقوں سے شہریوں نے میئر کراچی سے براہِ راست رابطہ کرکے اپنے مسائل، شکایات اور تجاویز سے آگاہ کیا۔ ای کچہری شام ساڑھے پانچ بجے سے ساڑھے چھ بجے تک جاری رہی، شہریوں نے واٹر کارپوریشن کی ہیلپ لائن 1334 پر رابطہ کرکے صفائی ستھرائی، سڑکوں کی مرمت، پانی کی فراہمی، سیوریج اور دیگر بلدیاتی امور سے متعلق اپنی شکایات پیش کیں۔میئر کراچی بیرسٹر مرتضیٰ وہاب نے شہریوں کی شکایات کا براہِ راست جائزہ لیتے ہوئے متعلقہ محکموں اور افسران کو فوری کارروائی کے احکامات جاری کیے اور ہدایت کی کہ جن مسائل کا موقع پر ازالہ ممکن ہے انہیں فوری طور پر حل کیا جائے جبکہ دیگر فوری نوعیت کی شکایات کے حل کے لیے چوبیس گھنٹوں کے اندر ہر ممکن اقدامات کیے جائیں، انہوں نے کہا کہ شہریوں کو ریلیف کی فراہمی میں کسی قسم کی تاخیر برداشت نہیں کی جائے گی اور متعلقہ افسران شکایات کے ازالے کو ترجیحی بنیادوں پر یقینی بنائیں۔میئر کراچی نے کہا کہ ای کچہری کا بنیادی مقصد شہریوں کی آواز براہِ راست سننا اور ان کے بلدیاتی مسائل کے حل کے لیے مؤثر اور بروقت اقدامات کرنا ہے، انہوں نے کہا کہ شہریوں کو اپنی شکایات اعلیٰ بلدیاتی قیادت تک پہنچانے کے لیے براہِ راست پلیٹ فارم فراہم کیا گیا ہے، جہاں ان کے مسائل کو فوری طور پر متعلقہ محکموں کے علم میں لاکر کارروائی کی ہدایت کی جارہی ہے، انہوں نے متعلقہ افسران کو یہ بھی ہدایت کی کہ شکایات پر کارروائی کے ساتھ شہریوں کو مسئلے کے حل میں ہونے والی پیشرفت سے بھی آگاہ رکھا جائے تاکہ شکایات کے ازالے کا نظام مزید مؤثر اور شفاف بنایا جاسکے،میئر کراچی بیرسٹر مرتضیٰ وہاب کی جانب سے منعقد کی جانے والی دوسری ای کچہری کو شہریوں کی جانب سے پذیرائی ملی جبکہ عوامی مطالبے اور مثبت ردعمل کے پیش نظر ای کچہری کا دورانیہ بھی بڑھا دیا گیا ہے اور آئندہ اسے مزید توسیع دینے پر بھی غور کیا جائے گا، میئر کراچی نے کہا کہ شہریوں کے مسائل سننے اور انہیں بروقت ریلیف فراہم کرنے کا یہ سلسلہ جاری رہے گا۔