مینجنگ ڈائریکٹر ہارٹیکلچر ایجنسی لاہور احمد عثمان جاوید کی زیرِ صدارت ڈائریکٹرز کا اجلاس منعقد ہوا، جس میں ایڈیشنل ڈائریکٹر جنرل زونا وحید بٹ سمیت ہارٹیکلچر اور انجینئرنگ ڈائریکٹرز نے شرکت کی۔ اجلاس میں ایم ڈی احمد عثمان جاوید نے بتایا کہ پنجاب کابینہ نے سی کیٹیگری کے 314 پارکس کی بحالی کے لیے ایک ارب 80 کروڑ روپے کی گرانٹ کی منظوری دے دی ہے۔ انہوں نے کہا کہ وزیراعلیٰ پنجاب مریم نواز شریف کی ہدایات کے مطابق سی کیٹیگری پارکس میں تفریحی سہولیات کو بہتر بنایا جائے گا۔ اس مقصد کے لیے پارکس کی باؤنڈری والز، نئے بنچز، گھاس اور پودوں کی فراہمی سمیت جھولوں کی مرمت اور واکنگ ٹریکس کو بہتر بنانے کے اقدامات کیے جائیں گے۔ایم ڈی ہارٹیکلچر ایجنسی لاہور احمد عثمان جاوید نے ہدایت کی کہ ہارٹیکلچر اور انجینئرنگ ڈائریکٹرز ایک ہفتے کے اندر پارکس کی بحالی کے منصوبوں کے پی سی ون مکمل کریں۔انہوں نے مزید ہدایت کی کہ متعلقہ ٹیمیں پارکس کے مشترکہ دورے کریں، منصوبوں کی تیاری میں مقررہ اسٹینڈرڈ ریٹس کو مدنظر رکھیں اور تمام امور بروقت مکمل کریں۔
