وزیر اعلیٰ پنجاب مریم نواز شریف کی ہدایت پر وزیر اعلیٰ پنجاب ڈویلپمنٹ پروگرام کے تحت جاری ترقیاتی کاموں کی سخت نگرانی اور سیفٹی پروٹوکولز کی جانچ کے لیے خصوصی ٹیم تشکیل دے دی گئی ہے۔ اس سلسلے میں 9 اضلاع میں سیفٹی اینڈ مانیٹرنگ آفیسرز تعینات کر دیے گئے ہیں تاکہ جاری منصوبوں میں حفاظتی اور ماحولیاتی معیارات کو یقینی بنایا جا سکے۔سیکرٹری ہاؤسنگ پنجاب نورالامین مینگل کی زیر صدارت منعقدہ جائزہ اجلاس میں جاری ترقیاتی منصوبوں کی پیش رفت کا تفصیلی جائزہ لیا گیا۔ اجلاس میں تمام اضلاع کے ایم ڈی واساز نے اب تک کی کارکردگی پر بریفنگ دی۔ سیکرٹری ہاؤسنگ نے ہدایت کی کہ کوالیفائیڈ انجینئرز فیلڈ میں موجود رہ کر حفاظتی، ماحولیاتی اور دیگر تکنیکی امور کی مؤثر مانیٹرنگ کریں۔نورالامین مینگل نے واضح کیا کہ حفاظتی پروٹوکولز میں کسی قسم کی غفلت ہرگز برداشت نہیں کی جائے گی۔ انہوں نے کہا کہ پنجاب کے 10 اضلاع میں ترقیاتی کام تیزی سے جاری ہیں جبکہ محکمہ ہاؤسنگ پنجاب 15 اضلاع میں منصوبوں کی نگرانی کر رہا ہے۔اجلاس میں جھنگ، ڈی جی خان، گجرات، حافظ آباد، جہلم، اوکاڑہ اور سرگودھا میں جاری منصوبوں کا تفصیلی جائزہ لیا گیا، جبکہ ننکانہ، راولپنڈی، ساہیوال، شیخوپورہ، سیالکوٹ، فیصل آباد، گوجرانوالہ اور ملتان میں بھی کام کی رفتار تیز کرنے اور بروقت موبلائزیشن کی ہدایت کی گئی۔سیکرٹری ہاؤسنگ نے کہا کہ تمام اضلاع کے درمیان معیار اور رفتار کے حوالے سے مثبت مقابلہ ہونا چاہیے۔ سیکرٹری ہاؤسنگ نے دن اور رات کے اوقات میں کام کی رفتار کو الگ الگ مانیٹر کرنے کی ہدایت بھی جاری کی۔ بہتر کارکردگی دکھانے والے کنٹریکٹرز کو تعریفی اسناد دی جائیں گی جبکہ غفلت برتنے والے افسران اور ٹھیکیداروں کے خلاف سخت کارروائی عمل میں لائی جائے گی۔سیکرٹری ہاؤسنگ نے کنسٹرکشن سائٹس پر حفاظتی اقدامات یقینی بنانے اور تمام عملے و سائٹ افسران کو سیفٹی پروٹوکولز پر مکمل عملدرآمد کی ہدایت کرتے ہوئے کہا کہ وزیر اعلیٰ پنجاب کے وژن کے مطابق سخت نگرانی کا عمل جاری رہے گا تاکہ ترقیاتی منصوبے بروقت اور معیاری انداز میں مکمل ہو سکیں۔
*محکمہ ہاؤسنگ پنجاب، ترقیاتی منصوبوں میں سیفٹی یقینی بنانے کے لیے خصوصی ٹیم تشکیل، 9 اضلاع میں مانیٹرنگ افسران تعینات*
