رمضان المبارک کی آمدآمد ہے عوام کی آگاہی واصلاح منبر و محراب سے کرنے کا مشن لیے ڈی جی فوڈ اتھارٹی کی جید علماء اور اوقاف عہدیداران سے تفصیلی ملاقات ہوئی جس میں ڈی جی فوڈ اتھارٹی عاصم جاوید نے کہا کہ عوام الناس کو قرآن و حدیث کی روشنی میں خوراک میں ملاوٹ کے متعلق آگاہ کیا جائے گا،
ہمارا شرعی فریضہ ہے کہ عوام تک سچ اور حق پر مبنی بات پہنچائی جائے، عوام کو طیب اور طاہر اشیاء بیچنے اور حلال و حرام کے متعلق راہنمائی ضروری ہے، پنجاب بھر کی تمام مساجد میں ماہ رمضان میں ملاوٹ کے حوالے سے اسلامی احکامات کے متعلق آگاہی دی جائے گی، محکمہ اوقاف عہدیداران کو قرآن و حدیث کی روشنی میں خوراک میں ملاوٹ سنگین جرم کا عوام کو درس دینے کی سفارش کی گئی۔ انہوں نے مزید کہا کہ رمضان المبارک میں ملاوٹ پر درس و تدریس،خطبات میں اسلامی قوانین کے بارے میں آگاہی دی جائے، جمعتہ المبارک اور عیدکے خطبات میں ملاوٹ کرنے پر سزاو جزا کے بارے آگاہ کیا جائے گا، منبر و محراب سے آگاہی اور تربیت سے ملاوٹ اور جعلسازی کے خاتمے میں مدد ملے گی، علماء اکرام کامعاشرے کی تربیت و اصلاح میں کردار انتہائی اہم ہے، علماء اکرام عوام تک محفوظ خوراک کی فراہمی کے مشن میں پنجاب فوڈ اتھارٹی کا دست و بازو بنیں، دین کی ترغیب کے ساتھ معاشرے کو درپیش مسائل کے حل میں علما کا کردار انتہائی اہمیت کا حامل ہے۔ اس موقع پر علماء نے کہا کہ خوراک میں ملاوٹ کرنا،کسی کو قتل کرنے کے مترادف ہے، ناقص ملاوٹ شدہ خوراک فروخت کرنا گناہ کبیرہ ہے، خوراک میں ملاوٹ اور جعلسازی ناقابل ضمانت جرم قرار دینا وقت کی عین ضرورت ہے، آج ہم محفوظ اور غذائیت سے بھرپور خوراک کھا رہے ہیں تو اسکا سہرا پنجاب فوڈ اتھارٹی کے سر سجتا ہے، معاشرے کی اصلاح کی ذمہ داری ہم سب کی ہے، پنجاب میں مل کر ملاوٹ کا خاتمہ یقینی بنائیں گے۔ ملاقات میں تمام مکاتبِ فکر کے جید علماء موجود تھے
