حکومت پنجاب کے وژن کے مطابق، واسا لاہور نے پانی کے عالمی دن کے موقع پر ایک آگاہی واک کا انعقاد کیا، جس کا مقصد عوام میں پانی کے مؤثر استعمال اور اس کے تحفظ کی اہمیت کو اجاگر کرنا تھا۔ یہ واک واسا ہیڈ آفس لاہور سے شروع ہوئی، جس کی قیادت وائس چیئرمین واسا چوہدری شہباز احمد، ڈی جی واسا پنجاب طیب فرید اور ایم ڈی واسا غفران احمد نے کی۔ڈی جی واسا پنجاب طیب فرید نے اس موقع پر کہا کہ "پانی ایک قیمتی نعمت ہے، اور ہمیں اسے ذمہ داری کے ساتھ استعمال کرنا چاہیے۔ عوام کو چاہیے کہ وہ اپنی روزمرہ کی زندگی میں پانی کی بچت کو یقینی بنائیں اور غیر ضروری ضیاع کو روکیں۔” انہوں نے شہریوں سے اپیل کی کہ وہ پانی بچانے کے جدید طریقے اپنائیں تاکہ مستقبل کی نسلوں کو پانی کی قلت کا سامنا نہ کرنا پڑے۔ایم ڈی واسا لاہور غفران احمد نے اپنے خیالات کا اظہار کرتے ہوئے کہا کہ "واسا لاہور پانی کے ذخائر کے تحفظ کے لیے جدید ٹیکنالوجی کے استعمال کو فروغ دے رہا ہے۔ پانی بچانے کی عادت اپنانا وقت کی اہم ضرورت ہے، اور اس مقصد کے لیے واسا ہر ممکن اقدامات کر رہا ہے۔”وائس چیئرمین واسا چوہدری شہباز احمد نے پانی کے تحفظ کو قومی ذمہ داری قرار دیتے ہوئے کہا کہ "پانی کی بچت صرف واسا کی نہیں بلکہ پوری قوم کی اجتماعی ذمہ داری ہے۔ ہر شہری کو چاہیے کہ وہ پانی کے ضیاع کو روکنے میں اپنا کردار ادا کرے۔” انہوں نے عوام سے اپیل کی کہ وہ پانی کے درست اور دانشمندانہ استعمال کو یقینی بنائیں تاکہ یہ قیمتی وسیلہ آنے والی نسلوں کے لیے محفوظ رہے۔واک میں واسا کے افسران، ملازمین، سول سوسائٹی کے نمائندوں اور شہریوں کی بڑی تعداد نے شرکت کی۔ شرکاء نے پانی کے تحفظ کے حوالے سے بینرز اور پلے کارڈز اٹھا رکھے تھے، جن پر پانی کی بچت کے حوالے سے مختلف نعرے درج تھے۔ اس موقع پر شہریوں نے اس عزم کا اظہار کیا کہ وہ پانی کے مؤثر استعمال اور ضیاع کی روک تھام کے لیے اپنی کوششیں جاری رکھیں گے۔
واسا لاہور اس عزم کے ساتھ آگے بڑھ رہا ہے کہ پانی کے تحفظ کو یقینی بنانے کے لیے جدید اقدامات کیے جائیں گے، تاکہ ایک بہتر اور محفوظ مستقبل کی بنیاد رکھی جا سکے۔
