ملکی و غیر ملکی سیاحوں کے لیے وزیر اعلیٰ پنجاب کی جانب سے احسن قدم کر دیا گیا۔وزیر اعلیٰ پنجاب کے حکم پر وزیر خوراک پنجاب بلال یاسین نے مری میں فوڈ اتھارٹی دفتر کا افتتاح کر دیا۔ تفصیلات کے مطابق ڈی جی فوڈاتھارٹی عاصم جاوید کی کاوش سے مری میں پنجاب فوڈ اتھارٹی دفتر قائم کر کے مکمل طور پر فعال کر دیا گیا۔ وزیر خوراک پنجاب نے بتایا سیاحوں کی پسندیدہ جگہ پر فوڈ اتھارٹی آفس کے قیام کا مقصد خوراک کے معیار کی مکمل جانچ پڑتال کو یقینی بنانا ہے۔ مری پاکستان میں ملکی و غیر ملکی سیاحوں کی توجہ کا مرکز ہے، فوڈ پوائنٹس پر کڑی نظر رکھی جائے گی۔ وزیر خوراک پنجاب بلال یاسین کا کہنا تھا مری کے داخلی راستوں کی ناکہ بندی کر کے ملحقہ علاقوں سے آنے والے گوشت اور دودھ کی چیکنگ کی جائے گی۔ریسٹورنٹس، کیفے، ٹی شاپس، سٹورز اور ہر قسم کے فوڈ بزنس کی انسپکشن کی جائے گی۔ خوراک کا کاروبار کرنے والے اعلیٰ معیار کو یقینی بنائیں،ناقص اشیاء خورونوش کے خلاف زیرو ٹالرینس ہے۔ سیاحوں کی صحت اور معیاری خوراک کی یقینی فراہمی اولین ترجیح ہے۔ وزیر خوراک نے کہا فوڈ بزنس آپریٹر خوراک میں ملاوٹ سے باز رہیں، قوانین پر عملدرآمد ہر صورت یقینی بنائیں۔مری میں آنے والے سیاح اشیاء کی خرید سے قبل جانچ پڑتال یقینی بنائیں، شکایت کی صورت میں فوڈ اتھارٹی ہیلپ لائن 1223 پر اطلاع دیں۔
