وزیرِ اعلیٰ پنجاب مریم نواز شریف کے ویژن کے تحت لاہور ویسٹ مینجمنٹ کمپنی کی جانب سے شہریوں کے لیے صاف ماحول کی فراہمی یقینی بنانے کے لیے محرم الحرام صفائی پلان پر عملدرآمد جاری ہے۔ سی ای او ایل ڈبلیو ایم سی بابر صاحب دین کی ہدایت پر مرحلہ وار 9 ٹاؤنز میں امام بارگاہوں کی واشنگ کی جا رہی ہے۔ عاشورہ سے قبل شہر کی 120 بڑی امام بارگاہوں کی خصوصی صفائی دھلائی مکمل کر لی جائے گی۔
شہر بھر میں ہونے والی مجالس، امام بارگاہوں اور جلوسوں کے روٹس پر صفائی انتظامات کو یقینی بنایا جا رہا ہے اور جلوس کے راستوں پر خصوصی صفائی ٹیمیں تعینات ہیں۔راوی ٹاؤن میں 13، شالیمار ٹاؤن میں 15،واہگہ ٹاؤن میں 8، اور عزیز بھٹی ٹاؤن میں 7 امام بارگاہوں کی صفائی دھلائی کا عمل مکمل کر لیا گیا ہے، گلبرگ ٹاؤن میں 21، علامہ اقبال ٹاؤن میں 16 امام بارگاہوں کی صفائی ستھرائی مکمل کی جا رہی ہے۔نشتر ٹاؤن 10، سمن آباد ٹاؤن میں 11، داتا گنج بخش ٹاؤن میں 19 امام بارگاہوں کی صفائی دھلائی کا عمل بھی جاری ہے۔مزید برآں محرم الحرام صفائی پلان کے مطابق زائرین کی سہولت کے لیے جلوسوں کے روٹس پر موجود کنٹینرز کو بر وقت خالی کیا جا رہا ہے۔موچی گیٹ سے کربلا گامے شاہ، شادمان سے شاہ جمال، پانڈو سٹریٹ اسلام پورہ سے پرانی انار کلی، علی رضا آباد رائیونڈ، اور ٹھوکر گاؤں جلوس کے راستوں پر ایل ڈ بلیو ایم سی کی آپریشن ٹیمیں صفائی پر مامور ہیں۔ سی ای او ایل ڈبلیو ایم سی بابر صاحب دین کا مزید کہنا ہے کہ محرم الحرام کے پورے مہینے اور خصوصاً پہلے 10 ایام میں صفائی کے خصوصی انتظامات کیے جارہے ہیں۔ ایل ڈبلیوایم سی کا 900 سے زائد عملہ اور تمام مشینری تینوں شفٹوں میں خصوصی صفائی آپریشن پر تعینات ہے۔ ایل ڈبلیو ایم سی کنٹرول روم سے صفائی انتظامات کی نگرانی اور شہریوں کی شکایات کے فوری ازالے کو یقینی بنایا جا رہا ہے۔محرم الحرام میں جلوسوں کے راستوں کی صفائی کے لیے تمام تر وسائل کو بروئے کار لایا جا رہا ہے۔ سی ای او ایل ڈبلیو ایم سی بابر صاحب دین نے مجالس اورجلوس کے شرکاء سے بھی گزارش کی ہے کہ ایل ڈبلیو ایم سی کے عملے سے تعاون کریں۔کوڑا ہمیشہ کوڑے دان میں ڈالیں۔صفائی سے متعلق شکایات کے ازالے کے لیے ایل ڈبلیو ایم سی کی ہیلپ لائن 1139پر رابطہ کریں یا سوشل میڈیا کا استعمال کریں۔
