*غیرقانونی تعمیرات کے خلاف ایل ڈی اے ٹاؤن پلاننگ ونگ متحرک،مختلف سکیموں میں 4املاک مسمار63 سربمہر۔*

ڈی جی ایل ڈی اے طاہر فاروق کی ہدایات پر ایل ڈی اے ٹاؤن پلاننگ ونگ غیرقانونی تعمیرات،غیرقانونی کمرشل عمارتوں اورکمرشل فیس نادہندگان املاک کے خلاف متحرک ہے۔ ایل ڈی اے ٹیموں نے مختلف سکیموں اور ایل ڈی اے کنٹرولڈ ایریا میں آپریشن کرکے63املاک سربمہرکر دیں۔ ایل ڈی اے ٹیموں نے سبزہ زار،کنٹرولڈ ایریا بند روڈ، گلشن راوی،سمن آباد، نیو مسلم ٹاؤن میں آپریشن کیا۔ایل ڈی اے ٹیموں نے سبزہ زار، ایل ڈی اے کنٹرولڈ ایریا کٹار بند روڈ پر 4غیرقانونی تعمیرات مسمار کر دیں۔ غیرقانونی کمرشل استعمال، کمرشل فیس کی عدم ادائیگی پرگلبرگ، فیصل ٹاؤن، نیو گارڈن ٹاؤن میں 21 املاک، گلشن راوی، سمن آباد، نیو مسلم ٹاؤن میں 42 املاک سربمہر کر دیں۔سیل کی گئی املاک میں نجی سکول، کلینک، بیو ٹی سیلون، ورکشاپ، فوڈ پوائنٹ، دکانیں، دفاتر ودیگر شامل ہیں۔ آپریشن چیف ٹاؤن پلانر ون اسد الزمان کی زیر نگرانی کیا گیا۔ڈی جی ایل ڈی اے کی ہدایت پرغیرقانونی تعمیرات، غیرقانونی کمرشل عمارتوں،کمرشل فیس نادہندگان املاک کے خلاف بلاامتیاز کارروائیاں جاری ہیں۔