اسلام آباد کے پارکس، گرین بیلٹس کو خوبصورت اور پرکشش بنانے کیلئے چیئرمین سی ڈی اے محمد علی رندھاوا کی زیر صدارت منگل کے روز سی ڈی اے ہیڈکوارٹرز میں اجلاس منعقد ہوا. اجلاس میں متعدد اہم فیصلے کئے گئے.
چیئرمین سی ڈی اے محمد علی رندھاوا کی زیر صدارت ہونے والے اجلاس میں فاطمہ جناح پارک F-9 اور دیگر پبلک پارکس کی تزئین و آرائش، لینڈ سکیپنگ اور ماحولیاتی بہتری کے جامع منصوبوں پر تبادلہ خیال کیا گیا.اجلاس میں چیئرمین سی ڈی اے نے ہدایت کی کہ فاطمہ جناح پارک کو مزید خوبصورت اور جدید بنایا جائے اور پارک کے تمام حصوں کی تزئین و آرائش کی جائے گی. انہوں نے ہدایت کی کہ رواں برس شجرکاری مہم کے تحت پارک میں مناسب جگہوں پر دیدہ زیب لینڈ سکیپنگ اور ہارٹیکلچر کا کام مکمل کیا جائے. پارک میں روشنی کے نظام کو بہتر بنانے کیلئے لائٹس لگائی جائیں گی تاکہ شام کے اوقات میں بھی شہری پارکس میں واک اور خوبصورت پودوں کی خوشبو اور ماحول سے لطف اندوز ہوسکیں.اجلاس کو بتایا گیا کہ چیئرمین سی ڈی اے محمد علی رندھاوا اور ممبر انوائرمنٹ طلعت محمود نے سی ڈی اے نرسری کا دورہ کیا. اجلاس میں فیصلہ کیا گیا کہ سی ڈی اے کی نرسری کو جدید خطوط پر نہ صرف مزید مؤثر بنایا جائے گا بلکہ اسے "گارڈینیا حب” میں تبدیل کیا جائے گا. جس میں ہر قسم کے پودے نہ صرف سستے داموں میسر ہونگے بلکہ ایک ایپ کے زریعے اس کو انتہائی کم نرخوں پر سرکاری اداروں کو فروخت کرنے کے علاوہ شہریوں کو بھی ایک جگہ خوبصورت اور دیدہ زیب پودے میسر ہونگے. چیئرمین سی ڈی اے نے ہدایت کی کہ سی ڈی اے کی نرسری کو ایک اسٹیٹ آف دی آرٹ ماڈل کے طور پر ترقی دی جائے جسمیں جدید کنٹرولڈ وینٹیلیٹڈ گرین ہاؤسز، فلاور شاپس اور کیفے شامل ہونگے. نرسری میں مختلف اقسام کے پودوں کی کاشت کے ساتھ ساتھ ہر موسم میں رنگا رنگ پھولوں کی نمائش کیلئے بھی جگہ مختص کی جائے گی.چیئرمین سی ڈی اے نے موسم بہار شجرکاری مہم 2025 کے تحت فاطمہ جناح پارک اور دیگر تمام پارکس اور دیگر مقامات پر وسیع پیمانے پر شجرکاری کرنے کی ہدایت کی. انہوں نے کہا کہ اس مہم میں سفارت خانوں، سول سوسائٹی اور ملٹی نیشنل کمپنیوں کو بھی شامل کیا جائے تاکہ شہر کو مزید سرسبز و شاداب بنانے میں مدد مل سکے .چیئرمین سی ڈی اے محمد علی رندھاوا نے اسلام آباد کی تمام شاہراہوں کے اطراف گرین بیلٹس، میڈین سٹریپس اور کھلی جگہوں پر پھلدار، پھولدار اور سایہ دار درخت لگانے کی ہدایت کی. انہوں نے کہا کہ لینڈ سکیپنگ کے ذریعے شہر کے قدرتی حسن کو مزید نکھارا جائے.چیئرمین سی ڈی اے محمد علی رندھاوا نے کہا کہ یہ تمام اقدامات اسلام آباد کو ایک سر سبز، پائیدار اور خوبصورت شہر بنانے کی جانب اہم قدم ہیں. انہوں نے کہا کہ ہم چاہتے ہیں کہ شہریوں کو صاف ستھرا اور پر آسائش ماحول میسر آئے. انہوں نے مزید کہا کہ سی ڈی اے نرسری کو گارڈینیا حب میں تبدیل کرنا اور پارکس کی اپ گریڈیشن ہمارے وژن کا حصہ ہے جسکا مقصد اسلام آباد کو پاکستان کا سب سے خوبصورت اور ماحول دوست شہر بنانا ہے.
