وزیراعلی مریم نواز کی ہدایت پر ستھرا پنجاب پروگرام ویسٹ ری سائیکلنگ کے اگلے مرحلے میں داخل ہو گیا ہے جس میں وہ لینڈ فل سائٹس جنہیں ماحولیاتی چیلنج سمجھا جاتا ہے کو قومی اثاثے میں تبدیل کیا جائے گا۔ اس ضمن میں وزیر بلدیات ذیشان رفیق کی زیر صدارت سول سیکرٹریٹ میں ایک اجلاس ہوا جس میں ویسٹ ری سائیکلنگ کے مختلف آپشنز پر غور کیا گیا۔ سیکرٹری لوکل گورنمنٹ شکیل احمد میاں، ایڈیشنل سیکرٹری ڈویلپمنٹ احمر کیفی نے شرکت کی۔ لاہور ویسٹ مینجمنٹ کمپنی (ایل ڈبلیو ایم سی کے) سی ای او بابر صاحب دین نے اجلاس کو بریفنگ دیتے ہوئے بتایا کہ لاہور کے نواح میں واقع لکھوڈیر سائٹ کے کاربن کریڈٹ سے پاکستان کو سالانہ ایک ارب روپے ریونیو متوقع ہے۔ وزیر بلدیات ذیشان رفیق نے کہا کہ پیرس معاہدے کے آرٹیکل چھ کے تحت کاربن کریڈٹ کا کلیم کیا جائے گا۔ انہوں نے کہا کہ جانوروں کی آلائشوں سے توانائی پیدا کرنے کا منصوبہ زیر غور ہے۔ صرف لاہور میں آلائشوں سے ایک ہزار ٹن توانائی پیدا کی جاسکتی ہے۔ وزیر بلدیات نے ویسٹ سے توانائی کے منصوبوں کے لئے لاہور یا اسلام آباد میں روڈ شو منعقد کرنے کی ہدایت کرتے ہوئے کہا کہ غیرملکی سفارتکاروں کو روڈ شو میں مدعو کیا جائے گا۔ بیرون ملک بھی روڈ شوز کر کے سرمایہ کاروں کو متوجہ کریں گے۔ پنجاب حکومت اس منصوبے کے تحت لاہور کے نواح میں ری سائیکلنگ پارک بنانے کا ارادہ رکھتی ہے۔ لکھوڈیر سائٹ میں 20 ٹن بائیوگیس پیدا کرنے کی صلاحیت ہے۔ ذیشان رفیق نے اس عزم کا اظہار کیا کہ وزیراعلی مریم نواز کے ویژن کے مطابق لاہور کے بعد دیگر شہروں میں ویسٹ کو بروئے کار لایا جائے گا۔سیکرٹری بلدیات شکیل احمد میاں نے سی ای او ایل ڈبلیو ایم سی کو وزیراعلی کیلئے جامع پریذینٹیشن بنانے کی ہدایت کرتے ہوئے کہا کہ ویسٹ کو پوری دنیا میں میں قابل استعمال بنایا جا رہا ہے کیونکہ ری سائیکلنگ ہی ویسٹ کے ماحولیاتی نقصانات کا حل ہے۔ بابر صاحب دین نے بتایا کہ محکمہ توانائی کے تعاون سے 50 میگاواٹ پاور پلانٹ کا منصوبہ بھی زیر غور ہے۔ لاہور میں ہر روز ستھرا پنجاب کے تحت بڑی مقدار ویسٹ جمع ہوتا ہے۔ انہوں نے بتایا کہ کئی ملکی اور غیر ملکی کمپنیوں نے ویسٹ کی ری سائیکلنگ میں دلچسپی ظاہر کی ہے۔
