نگران وزیر اعلیٰ گلگت بلتستان جسٹس (ر) یار محمد نے ایڈیشنل چیف سیکریٹری کی جانب سے محکمہ پلاننگ اینڈ ڈویلپمنٹ کے حوالے سے دیئے جانے والے محکمانہ بریفنگ کے موقع پر گفتگو کرتے ہوئے کہا کہ گلگت بلتستان میں پایہ دار ترقی اور ترقیاتی عمل کو تیز کرنے کیلئے این ایف سی فارمولے کے تحت گلگت بلتستان کو بھی شیئر کی فراہمی لازمی ہے۔ وزیر اعظم پاکستان سے خصوصی سفارش کی جائے گی کہ گلگت بلتستان کو این ایف سی فارمولے کے تحت شیئر دیا جائے۔ پلاننگ اینڈ ڈویلپمنٹ کا محکمہ صوبے کی تعمیر و ترقی میں انتہائی اہم ہے۔ صوبے کی تعمیر و ترقی کے سفر کو تیز کرنے کیلئے ٹارگٹڈ منصوبوں کی بروقت تکمیل کو یقینی بنائی جائے۔ تمام ترقیاتی منصوبوں کی معیار اور رفتار کو بہتر بنانے کیلئے جدید خطوط کے مطابق مانیٹرنگ کی جائے تاکہ ان منصوبوں کے ثمرات عام عوام تک پہنچ سکیں اور ان کی معیار زندگی بہتر بنائی جاسکے۔ نگران وزیر اعلیٰ نے کہا کہ بے روزگاری پر قابو پانے کیلئے پرائیویٹ سیکٹر کی حوصلہ افزائی کرنا ہوگا، جس کیلئے حکمت عملی مرتب کی جائے۔ گلگت بلتستان میں جاری بجلی بحران کے مستقل حل کیلئے زیر تعمیر تمام پاور پروجیکٹس کی ریلیز کو بلاتعطل فراہمی اور ان منصوبوں کی مقررہ مدت میں ہر صورت تعمیر یقینی بنایا جائے۔ ناقص منصوبہ بندی اور غلط فزبلٹی اور PC-1 بنانے والے آفیسران کے خلاف سخت محکمانہ کارروائی کی جائے تاکہ گلگت بلتستان نامکمل اور بیمار منصوبوں کا مرکز نہ بنے۔ منصوبوں کی غیر ضروری رویژن کی سختی سے حوصلہ شکنی کی جائے۔ بلاتفریق جزاء و سزاء کا سخت نظام رائج کئے بغیر منصوبوں میں شفافیت اور رفتار میں تیزی ممکن نہیں۔ جن آفیسران کی نااہلی اور ناقص منصوبہ بند کی وجہ سے منصوبے التواء کا شکار ہیں اور قومی خزانے کو نقصان ہوا ہے ان کے خلاف بلاتفریق سخت محکمانہ کارروائی کی جائے۔ نگران وزیر اعلیٰ نے کہاکہ سیوریج کے نام پر گلگت کے تمام شاہراہوں کو کھنڈرات میں تبدیل کیاگیا ہے۔ تمام علاقوں سے ناقص منصوبہ بندی اور غیر معیاری کام کے حوالے سے شکایات موصول ہورہی ہیں۔ نگران وزیر اعلیٰ نے ایڈیشنل چیف سیکریٹری ڈویلپمنٹ کو ہدایت کی ہے کہ متعلقہ محکمے کو شاہراہوں کی دوبارہ میٹلنگ پیور مشین کے ذریعے سے کرنے اور سیوریج کا کام معیاری طریقے سے بروقت مکمل کرنے کا پابند بنایا جائے۔ نگران وزیر اعلیٰ نے محکمہ پلاننگ اینڈ ڈویلپمنٹ کی جانب سے ترقیاتی منصوبوں کی منظوری سمیت معیار اور رفتار کی مانیٹرنگ کا سسٹم آن لائن کرنے کے اقدام کو سراہتے ہوئے کہا کہ اس سسٹم کو رائج کرنے سے نظام میں شفافیت آئے گی۔
