ڈپٹی میئر کراچی سلمان عبداللہ مراد نے کراچی پریس کلب کا دورہ کیا اور پریس کلب کے نو منتخب عہدیداران کو کامیابی پر دلی مبارکباد دی، اس موقع پر انہوں نے نو منتخب صدر فاضل جمیلی، نائب صدر ارشاد کھوکھر، سیکریٹری محمد اسلم خان، جوائنٹ سیکریٹری فاروق سمیع اور خازن عمران ایوب کو سندھ کی روایتی اجرک پیش کی اور نیک تمناؤں کا اظہار کیا،
ڈپٹی میئر کراچی سلمان عبداللہ مراد نے کراچی پریس کلب کی گورننگ باڈی کے نو منتخب ارکان قاری عبدالجبار، اختر سومرو، شیما صدیقی، فریال عارف، جاوید صبا، فرید عالم اور جاوید مہر کے لیے بھی نیک خواہشات کا اظہار کرتے ہوئے امید ظاہر کی کہ نئی قیادت صحافتی برادری کی خدمت میں اپنا بھرپور کردار ادا کرے گی،
اس موقع پر گفتگو کرتے ہوئے ڈپٹی میئر کراچی سلمان عبداللہ مراد نے کہا کہ کراچی پریس کلب کے انتخابات میں ڈیموکریٹس پینل کی کامیابی صحافتی برادری کے اعتماد کا واضح ثبوت ہے، انہوں نے کہا کہ کراچی پریس کلب نے ہمیشہ جمہوری اقدار اور آزادی صحافت کے فروغ میں نمایاں کردار ادا کیا ہے اور یہ ادارہ کراچی شہر کی صحافتی تاریخ کا ایک مضبوط اور اہم ستون ہے،ڈپٹی میئر کراچی سلمان عبداللہ مراد نے کہا کہ نو منتخب قیادت سے توقع ہے کہ وہ صحافیوں کے مسائل کے حل کے لیے بھرپور کوشش کرے گی اور عوام کی آواز کو مؤثر انداز میں اجاگر کرتی رہے گی، انہوں نے بلدیہ عظمیٰ کراچی کی جانب سے صحافی برادری کے ساتھ مکمل تعاون کی یقین دہانی بھی کرائی۔
