*غیر قانونی کمرشل عمارتوں کے خلاف ایل ڈی اے ٹاؤن پلاننگ ونگ متحرک،مختلف سکیموں میں 88املاک سربمہرکر دیں۔*

ڈی جی ایل ڈی اے طاہر فاروق کی ہدایات پر ایل ڈی اے ٹاؤن پلاننگ ونگ غیرقانونی کمرشل عمارتوں اورکمرشل فیس نادہندگان املاک کے خلاف متحرک ہے۔ ایل ڈی اے ٹیموں نے مختلف سکیموں اور ایل ڈی اے کنٹرولڈ ایریا میں آپریشن کرکے88املاک سربمہر کر دیں۔ایل ڈی اے ٹیموں نے سمن آباد، گلشن راوی، ڈیفنس روڈ، فیصل ٹاؤن اور ماڈل ٹاؤن ایکسٹینشن، نیسپاک سوسائٹی ، جی سی پی اور جوہر ٹاؤن میں آپریشن کیا۔ایل ڈی اے ٹیموں نے غیرقانونی کمرشل استعمال، کمرشل فیس کی عدم ادائیگی پرسمن آباد اور گلشن راوی میں 20املاک، فیصل ٹاؤن اورماڈل ٹاؤن ایکسٹینشن میں 20املاک، نیسپاک سوسائٹی میں 15 املاک، جی سی پی اور جوہر ٹاؤن میں 23 املاک سربمہر کر دیں۔ٹیموں نے ریکوری آپریشن کے دوران ڈیفنس روڈ پر10املاک سربمہر کر دیں۔ سیل کی گئی املاک میں نجی سکول،کالج، ریستوران،فوڈ پوائنٹ، گراسری سٹور، کلینک،فارمیسی، پراپرٹی آفس،بیوٹی سیلون، آٹوورکشاپ،کالج،الیکٹرک سٹور، دکانیں، دفاتر ودیگر شامل ہیں۔آپریشن چیف ٹاؤن پلانرون اسد الزمان اور چیف ٹاؤن پلانر ٹو اظہر علی کی زیر نگرانی کیا گیا۔ڈی جی ایل ڈی اے کی ہدایت پر غیرقانونی کمرشل عمارتوں،کمرشل فیس نادہندگان املاک کے خلاف بلاامتیاز کارروائیاں جاری ہیں۔