نگران وزیر بلدیات گلگت بلتستان انجینئر الطاف حسین کا چیف سیکرٹری گلگت بلتستان ارشد مجید مہمند کے ہمراہ سکردو میں زیر تعمیر 250 بستروں پر مشتمل ہسپتال کا دورہ

نگران وزیر صحت ڈاکٹر نیاز، نگران وزیر اطلاعات و انفارمیشن ٹیکنالوجی غلام عباس اور نگران وزیر بلدیات (ایل جی آر ڈی) گلگت بلتستان انجینئر الطاف حسین نے چیف سیکرٹری گلگت بلتستان ارشد مجید مہمند کے ہمراہ جمعہ کے دن سکردو میں زیر تعمیر 250 بستروں پر مشتمل اسپتال (فیز ون) کا دورہ کیا۔دورے کے دوران پراجیکٹ ڈائریکٹر انجینئر رضوان علی نے منصوبے پر جاری پیش رفت کے حوالے سے تفصیلی بریفنگ دی اور منصوبے کی بروقت تکمیل کے لیے درکار اہم اقدامات سے آگاہ کیا۔ انہوں نے اس بات پر بھی زور دیا کہ اسپتال کی جلد تکمیل یقینی بنانے کے لیے پی سی ون میں نظرثانی نہایت ضروری ہے۔چیف سیکرٹری نے مکمل شدہ حصوں کا تفصیلی معائنہ کیا، پی ایم یو ٹیم کی کاوشوں کو سراہا اور منصوبے کے ڈیزائن پر اطمینان کا اظہار کیا۔ انہوں نے نظرثانی شدہ پی سی ون کی منظوری کے لیے بھرپور تعاون کی یقین دہانی کراتے ہوئے کہا کہ یہ اسپتال گلگت بلتستان کے عوام کے لیے صحت کی سہولیات فراہم کرنے میں کلیدی کردار ادا کرے گا۔انہوں نے منصوبے کو جلد از جلد مکمل کرنے کی ضرورت پر زور دیا تاکہ علاقے کی صحت سے متعلق ضروریات کو مؤثر انداز میں پورا کیا جا سکے۔اس موقع پر نگران وزراء نے پراجیکٹ ڈائریکٹر اور اسپتال انتظامیہ کو ہدایت کی کہ تعمیراتی کام میں تیزی لائی جائے اور مقررہ مدت کے اندر منصوبے کو مکمل کیا جائے۔