میئر کراچی بیرسٹر مرتضیٰ وہاب کی ہدایت پر بلدیہ عظمیٰ کراچی نے شہر میں متوقع شدید گرمی کی لہر سے نمٹنے کے لیے ہنگامی اقدامات کا اعلان کر دیا ہے، اس ضمن میں کے ایم سی کے زیرانتظام تمام اسپتالوں میں فوری طور پر خصوصی ہیٹ ویو وارڈز قائم کرنے کی ہدایت جاری کردی گئی ہے، میئر کراچی نے سینئر ڈائریکٹر میڈیکل ہیلتھ اینڈ سروسز اور تمام میڈیکل سپرنٹنڈنٹس کو ہدایت کی ہے کہ شدید گرمی کے باعث شہریوں، خصوصاً بزرگ افراد، بچوں اور کھلے ماحول میں کام کرنے والے مزدوروں کو صحت کے سنگین خطرات لاحق ہو سکتے ہیں، اس لیے تمام اسپتالوں میں ہیٹ ویو سے متاثرہ مریضوں کے بروقت اور مؤثر علاج کے لیے خصوصی انتظامات کیے جائیں، ہیٹ ویو وارڈز میں بلاتعطل بجلی کی فراہمی اور مؤثر کولنگ سسٹم (پنکھے اور ایئر کنڈیشنرز) کو ہر صورت فعال رکھا جائے جبکہ ضروری ادویات، آئی وی فلوئڈز، او آر ایس اور دیگر ہنگامی طبی سامان کی دستیابی بھی یقینی بنائی جائے،میئر کراچی نے کہا کہ تربیت یافتہ ڈاکٹرز اور پیرامیڈیکل اسٹاف کی چوبیس گھنٹے تعیناتی یقینی بنائی جائے، ایمرجنسی رسپانس پروٹوکول اور ٹرائیج سسٹم کو مؤثر انداز میں نافذ کیا جائے تاکہ مریضوں کو فوری طبی امداد فراہم کی جا سکے، اس کے ساتھ ساتھ مریضوں اور تیمارداروں کے لیے صاف پینے کے پانی کی فراہمی اور اسپتالوں میں احتیاطی تدابیر سے متعلق آگاہی مہم چلانے کی بھی ہدایت دی گئی ہے،اس اقدام کو نہایت ہنگامی قرار دیتے ہوئے متعلقہ افسران کو روزانہ کی بنیاد پر صورتحال کی رپورٹ پیش کرنے کی بھی ہدایت کی ہے تاکہ ہیٹ ویو کے دوران شہریوں کو ہر ممکن طبی سہولیات بروقت فراہم کی جا سکیں۔
