عید الاضحیٰ کے موقع پر شہریوں کو بہترین ماحول فراہم کرنے کے وژن کی روشنی میں ضلعی انتظامیہ لاہور نے شہر بھر میں عارضی مویشی منڈیوں کے قیام اور وہاں بہترین معیار کی سہولیات کی فراہمی کو یقینی بنا دیا ہے تاکہ قربانی کے جانوروں کی خرید و فروخت کا عمل سہل اور منظم طریقے سے مکمل کیا جا سکے۔ اس سلسلے میں ڈپٹی کمشنر لاہور کیپٹن (ر) محمد علی اعجاز نے کاہنہ کاچھا روڈ پر قائم عارضی مویشی منڈی کا تفصیلی دورہ کیا جہاں انہوں نے پنجاب کیٹل مارکیٹ مینجمنٹ کمپنی کی جانب سے کیے گئے تمام تر انتظامی، تیکنیکی اور حفاظتی انتظامات کا جائزہ لیا اور موقع پر موجود افسران کو ضروری ہدایات جاری کیں۔ دورے کے دوران ڈپٹی کمشنر کو بریفنگ دیتے ہوئے بتایا گیا کہ شہریوں اور بیوپاریوں کی سہولت کے لیے منڈی میں صفائی ستھرائی کے اعلیٰ معیار برقرار رکھنے کے ساتھ ساتھ سائے کے لیے شامیانے، پینے کے صاف پانی کی فراہمی، واٹر پمپس کی تنصیب اور مویشیوں کے لیے چارے کی دستیابی کو ہر صورت یقینی بنایا گیا ہے۔ ڈپٹی کمشنر نے منڈی میں قائم میڈیکل کیمپس کا بھی دورہ کیا اور ہدایت کی کہ یہاں ادویات اور پیرا میڈیکل اسٹاف کی ہمہ وقت موجودگی کو یقینی بنایا جائے تاکہ کسی بھی ہنگامی صورتحال میں فوری طبی امداد فراہم کی جا سکے۔ انہوں نے انتظامیہ کو حکم دیا کہ پارکنگ ایریا میں روشنی کے مناسب انتظامات اور واضح سائن بورڈز نصب کیے جائیں تاکہ شہریوں کو آمد و رفت میں دشواری کا سامنا نہ کرنا پڑے جبکہ ٹریفک کی روانی کو برقرار رکھنے کے لیے ٹریفک مینجمنٹ پلان پر سختی سے عملدرآمد کرایا جائے۔ ڈی سی لاہور نے بیوپاریوں سے بھی گفتگو کی جنہوں نے انتظامیہ کی جانب سے فراہم کردہ سہولیات پر مکمل اطمینان کا اظہار کیا جس پر ڈپٹی کمشنر نے انہیں یقین دلایا کہ ان کے تحفظ اور آرام کے لیے تمام تر وسائل بروئے کار لائے جا رہے ہیں۔ انہوں نے مزید ہدایت کی کہ منڈی میں شہریوں کی رہنمائی کے لیے انفارمیشن ڈیسک فعال رکھے جائیں اور صفائی کے عملے کی فیلڈ میں موجودگی کو مسلسل مانیٹر کیا جائے کیونکہ عوامی سہولیات اور صفائی کے معاملے پر کوئی سمجھوتہ نہیں کیا جائے گا۔ ڈپٹی کمشنر لاہور نے واضح کیا کہ وہ خود تمام مویشی منڈیوں کی مانیٹرنگ کر رہے ہیں تاکہ حکومتی ہدایات کے مطابق ایک مثالی نظام نافذ کیا جا سکے اور شہریوں کو ایک پرسکون اور قانون پسند ماحول میں قربانی کے جانور خریدنے کی سہولت میسر آئے۔ انہوں نے عزم ظاہر کیا کہ جدید تیکنیکی انتظامات اور مربوط حکمت عملی کے ذریعے اس سال عید الاضحیٰ پر شہریوں کا ضلعی انتظامیہ پر اعتماد مزید بحال ہوگا اور ہم سب مل کر اس مذہبی فریضے کی ادائیگی کو کامیاب بنائیں گے۔
عید الاضحیٰ پر مثالی انتظامات ڈپٹی کمشنر لاہور کا مویشی منڈیوں کا دورہ،انتظامات کا جائزہ
