وزیراعلیٰ گلگت بلتستان امجد حسین نے ضلع دیامر کے علاقوں تھک، نیاٹ، گیس بالا اور یشوکل داس میں مسلسل بارشوں اور سیلابی ریلوں سے پیدا ہونے والی ہنگامی صورتحال پر گہری تشویش کا اظہار کرتے ہوئے متعلقہ اداروں کو فوری امدادی و بحالی اقدامات تیز کرنے کی ہدایت جاری کر دی ہے۔وزیراعلیٰ نے چیف سیکرٹری، گلگت بلتستان ڈیزاسٹر مینجمنٹ اتھارٹی (GBDMA)، ضلعی انتظامیہ دیامر، محکمہ صحت، محکمہ تعمیرات عامہ، پولیس اور دیگر متعلقہ اداروں کو ہدایت کی ہے کہ متاثرہ علاقوں میں فوری طور پر امدادی سامان، خوراک، پینے کے صاف پانی، ادویات اور دیگر ضروری اشیائے ضروریہ کی فراہمی یقینی بنائی جائے اور متاثرہ خاندانوں کو ہر ممکن ریلیف فراہم کیا جائے۔وزیراعلیٰ نے کہا کہ حکومت گلگت بلتستان اس مشکل گھڑی میں متاثرہ عوام کو تنہا نہیں چھوڑے گی۔ انسانی جانوں کے تحفظ، متاثرہ افراد کی بروقت امداد اور بنیادی سہولیات کی بحالی حکومت کی اولین ترجیح ہے۔ انہوں نے متعلقہ اداروں کو ہدایت کی کہ نقصانات کا فوری سروے مکمل کرکے بحالی کے لیے جامع منصوبہ مرتب کیا جائے۔وزیراعلیٰ نے بابوسر روڈ کی بندش کے پیش نظر مسافروں اور سیاحوں سے اپیل کی کہ وہ غیر ضروری سفر سے گریز کریں، ضلعی انتظامیہ کی ہدایات پر عمل کریں اور موسمی صورتحال معمول پر آنے تک احتیاطی تدابیر اختیار کریں۔انہوں نے عوام کو یقین دلایا کہ حکومت صورتحال کی مسلسل نگرانی کر رہی ہے اور جہاں کہیں بھی مزید امداد کی ضرورت پیش آئے گی، وہاں فوری اقدامات کیے جائیں گے تاکہ متاثرہ خاندانوں کی مشکلات میں جلد از جلد کمی لائی جا سکے۔
وزیراعلیٰ گلگت بلتستان امجد حسین کی ضلع دیامر کے سیلاب سے متاثرہ علاقوں میں فوری امدادی کارروائیوں کی ہدایت
