ترجمان میئر کراچی اور کراچی میٹروپولیٹن کارپوریشن میں پاکستان پیپلزپارٹی کے پارلیمانی لیڈر کرم اللہ وقاصی نے وزیراعلیٰ سندھ سید مراد علی شاہ کی زیر صدارت سندھ کابینہ کے اجلاس میں کراچی کی ترقی، انفرااسٹرکچر کی بہتری، پانی و نکاسی آب کے مسائل کے حل، صحت، تعلیم اور توانائی کے شعبوں سے متعلق اہم فیصلوں کا خیرمقدم کرتے ہوئے کہا ہے کہ پاکستان پیپلزپارٹی کراچی کی تقدیر بدلنے اور شہریوں کو بہتر سہولیات فراہم کرنے کے لیے عملی اقدامات کر رہی ہے۔ترجمان میئر کراچی کرم اللہ وقاصی نے کہا کہ سندھ کابینہ کی جانب سے کراچی کے انفرااسٹرکچر کی بہتری کے لیے 11 ارب 19 کروڑ 80 لاکھ روپے کے ترقیاتی منصوبوں کی منظوری ایک تاریخی قدم ہے، جس سے شہر کی اہم شاہراہوں کی بحالی، سڑکوں کی تعمیر و مرمت اور ٹریفک کے نظام میں نمایاں بہتری آئے گی۔ انہوں نے کہا کہ کلفٹن، کورنگی، اسکیم 33 اور دیگر اہم علاقوں میں ترقیاتی منصوبے کراچی کے شہریوں کو بہتر سفری سہولیات فراہم کرنے میں اہم کردار ادا کریں گے۔انہوں نے کہا کہ کراچی کو درپیش پانی اور نکاسی آب کے دیرینہ مسائل کے حل کے لیے سندھ کابینہ کی جانب سے 16 ترقیاتی منصوبوں کے لیے 8 ارب 82 کروڑ 40 لاکھ روپے کے اضافی فنڈز کی منظوری قابل ستائش اقدام ہے۔ ان منصوبوں کی تکمیل سے شہریوں کو صاف پانی کی فراہمی اور سیوریج کے مسائل کے حل میں نمایاں مدد ملے گی، جبکہ شہری انفرااسٹرکچر مزید مضبوط ہوگا۔ترجمان میئر کراچی کرم اللہ وقاصی نے پاور ہاؤس چورنگی اور سرجانی ٹاؤن فور کے چورنگی پر دو بڑے فلائی اوورز کی تعمیر کی منظوری کو کراچی کے ٹریفک نظام میں بہتری کی جانب اہم پیش رفت قرار دیتے ہوئے کہا کہ ان منصوبوں سے روزانہ لاکھوں شہری مستفید ہوں گے، ٹریفک جام میں کمی آئے گی اور شہریوں کا قیمتی وقت اور ایندھن دونوں بچ سکیں گے۔انہوں نے سندھ کابینہ کی جانب سے فاطمیہ انٹرنیشنل یونیورسٹی کراچی کے چارٹر کی منظوری کو تعلیم کے فروغ کے لیے مثبت اقدام قرار دیتے ہوئے کہا کہ نئی اعلیٰ تعلیمی درسگاہوں کے قیام سے نوجوانوں کو معیاری تعلیم اور تحقیق کے مزید مواقع میسر آئیں گے۔ترجمان میئر کراچی کرم اللہ وقاصی نے صحت کے شعبے میں واجبات کی ادائیگی کے لیے 39 کروڑ 50 لاکھ روپے سے زائد فنڈز کی منظوری اور سندھ نرسنگ ورک فورس اسٹریٹجک پالیسی کی منظوری کا بھی خیرمقدم کرتے ہوئے کہا کہ یہ اقدامات صوبے کے صحت کے نظام کو مزید مستحکم بنانے میں معاون ثابت ہوں گے۔ترجمان میئر کراچی کرم اللہ وقاصی نے کہا کہ وزیراعلیٰ سندھ سید مراد علی شاہ کی قیادت میں سندھ حکومت کراچی سمیت پورے صوبے میں ترقیاتی عمل کو تیز کر رہی ہے اور پاکستان پیپلزپارٹی عوامی خدمت، بنیادی سہولیات کی فراہمی اور شہری مسائل کے مستقل حل کے لیے اپنی جدوجہد جاری رکھے گی۔ انہوں نے اس عزم کا اظہار کیا کہ کراچی کو جدید، ترقی یافتہ اور عالمی معیار کے شہر میں تبدیل کرنے کے لیے تمام دستیاب وسائل بروئے کار لائے جائیں گے۔
