وزیر اعلیٰ پنجاب کی خصوصی ہدایت پر مرکزی امام بارگاہوں کے دورے اور منتظمین سے ملاقات کا سلسلہ جاری ہے۔ کمشنر لاہور زید بن مقصود نے محرم الحرام انتظامات جائزہ کے حوالے سے بی بی پاک دامن دربار، امام بارگاہ عنایت علی شاہ گڑھی شاہو اور امام بارگاہ کاشانہ عباس علمدار ٹاون شپ کا دورہ کیا۔ کمشنر لاہور نے تمام متعلقہ انتظامی افسران کے ہمراہ امام بارگاہوں میں ضلعی انتظامیہ کی جانب سے کیے گئے اقدامات کا جائزہ لیا۔ اس موقع پر اے سی شالامار و ایس پی پولیس نے انتظامات بارے بریفنگ دیتے ہوئے کہا کہ امام بارگاہوں اور جلوس روٹس کی مانیٹرنگ، ریسکیو، میڈیکل کور، سکیورٹی، لائٹنگ اور نکاسی آب انتظامات مکمل ہیں، امام بارگاہوں کے منتظمین سے مکمل رابطہ میں ہیں۔
کمشنر لاہور نے امام بارگاہ کاشانہ عباس ٹاون شپ اور بی بی پاک دامن کے منتظمین و لائسنس ہولڈرز سے ملاقات کی۔ منتظمین و لائسنس ہولڈرز نے ضلعی انتظامیہ کی جانب سے کیے گئے انتظامات پر اطمینان کا اظہار کیا۔کمشنر لاہور نے کہا ہے کہ وزیر اعلی پنجاب کی خصوصی ہدایت پر مرکزی امام بارگاہوں کے روزانہ کی بنیاد پر دورے ہو رہے ہیں، انہوں نے کہا کہ وزیر اعلی پنجاب کی محرم انتظامات کو ہر پہلو سے یقینی بنانے کی ہدایات کے مطابق اقدامات اٹھائے گئے ہیں۔ کمشنر لاہور نے کہا کہ مرکزی امام بارگاہوں و جلوسوں کے روٹس کی تمام ضروریات کو یقینی بنایا جارہا ہے اور انتظامی مانیٹرنگ بھی جاری ہے۔ انتظامیہ کا منتظمین و لائسنس ہولڈرز سے مکمل رابطہ ہے محرم جلوس میں اوقات کی پابندی پر عملدرآمد یقینی بنائیں، کمشنر لاہور نے مزید کہا کہ حکومتی ہدایات اور ایس اوپی ز کیمطابق تمام انتظامات کو یقینی بنایا گیا ہے اور روزانہ کی بنیاد پر جائزہ لیا جارہا ہے۔
