وزیر اعظم شہباز شریف دورہ کراچی کے موقع پر سندھ کے سینئر وزیر شرجیل انعام میمن کے گھر پہنچ گئے۔ سندھ کے سینئر وزیر اور صوبائی وزیر برائے اطلاعات ، ٹرانسپورٹ و ماس ٹرانزٹ شرجیل انعام میمن کے آمد کے موقع پر نائب وزیر اعظم اسحاق ڈار، وفاقی وزراء محمد اورنگزیب، مصدق ملک، عطا تارڑ بھی وزیر اعظم شہباز شریف کے ہمراہ تھے۔ سندھ کے وزیر اعلیٰ مراد علی شاہ اور گورنر سندھ کامران ٹسوری بھی وزیر اعظم کے ہمراہ سینئر وزیر شرجیل انعام میمن کے گھر تشریف لائے۔ اس موقع پر پیپلز پارٹی سینئر رہنما سید خورشید شاہ، سینیٹر نوید قمر، نثار احمد کھہڑو، اسپیکر سندھ اسمبلی سید اویس قادر شاہ، صوبائی وزیر سعید غنی، معاون خصوصی قاسم نوید قمر، ایم این اے کرنل (ر) اسد اسلم نیازی اور دیگر بھی موجود تھے۔
سینئر وزیر شرجیل انعام میمن اور ان کے صاحبزادے راول شرجیل میمن نے وزیر اعظم شہباز شریف کا گھر آمد پر گرمجوشی سے استقبال کیا۔ملاقات کے دوران وزیر اعظم شہباز شریف نے سینئر وزیر شرجیل انعام میمن کو پوتے کی مبارکباد دی۔ سینئر وزیر شرجیل انعام میمن نے میزبانی کا موقع دینے پر وزیر اعظم شہباز شریف کا شکریہ ادا کیا۔ خوشگوار ماحول میں ہونے والی ملاقات کے دوران ملکی و صوبائی صورتحال سمیت دیگر امور پر گفتگو کی گئی۔
