گلگت بلتستان، ٹریفک حادثات میں خطرناک حد تک اضافہ، احتیاطی تدابیر کے لئےآگاہی مہم ،تمام صوبوں کو مراسلہ جاری

گلگت۔ وزیر اعلیٰ گلگت بلتستان حاجی گلبر خان کی ہدایت پر پرنسپل سیکرٹری برائے وزیر اعلیٰ عثمان احمد نے پرنسپل سیکرٹری برائے وزیر اعظم آزاد جموں و کشمیر، پرنسپل سیکرٹری برائے وزیر اعلیٰ بلوچستان، پرنسپل سیکرٹری برائے وزیر اعلیٰ سندھ، پرنسپل سیکرٹری برائے وزیر اعلیٰ پنجاب اور پرنسپل سیکرٹری برائے وزیر اعلیٰ خیبر پختونخوا کو تحریر کردہ خصوصی مراسلوں میں گلگت بلتستان میں آنے والے سیاحوں کی بڑی تعداد اور حادثات کی تعداد میں اضافی کی وجہ سے قیمتی انسانی جانوں کے نقصان پر قابو پانے کے حوالے سے فوری احتیاطی تدابیر اور حفاظتی اقدامات پر مبنی عوامی آگاہی مہم شروع کرنے پر زور دیا ہے۔ مراسلے میں حالیہ دنوں میں بڑھتے ہوئے ٹریفک حادثات پر توجہ مبذول کرواتے ہوئے لکھا ہے کہ سیاحوں کی بڑی تعداد آٹو ٹرانسمشن گاڑیوں کا استعمال کرتی ہے۔ گلگت بلتستان کے پہاڑی علاقوں اور مخصوص جغرافیہ والے علاقوں میں آٹو ٹرانسمشن گاڑیوں کو چلانے کے لئے خصوصی مہارت درکار ہوتی ہے۔ ٹریفک حادثات میں اس بات کا مشاہدہ کیا گیا ہے کہ ڈرائیونگ میں مہارت نہ ہونے اور لاپرواہی کی وجہ سے اکثر المناک ٹریفک حادثات رونما ہوئے ہیں اور قیمتی انسانی جانوں کا نقصان ہوا ہے۔ لہذا ان حقائق کے پیش نظر فوری طور پر ملک کے دیگر علاقوں سے گلگت بلتستان آنے والے سیاحوں کے جانوں کی حفاظت کے لئے پرنٹ، الیکٹرانک اور سوشل میڈیا کے ذریعے آگاہی مہم شروع کرنے کی ضرورت ہے۔ حکومت گلگت بلتستان نے صوبے میں آنے والے سیاحوں کو ٹریفک حادثات سے بچاؤ کے حوالے سے ٹوریزم پولیس کا قیام عمل میں لایا ہے جو گلگت بلتستان کے داخلی اور سیاحتی مقامات پر عوامی آگاہی مہم سمیت سیاحوں کی مدد اور رہنمائی کے حوالے سے خدمات سر انجام دے رہے ہیں۔ صوبائی حکومت کی جانب سے وزیر اعظم پاکستان شہباز شریف کو موٹروے پولیس کے دائرہ کار گلگت بلتستان تک وسعت دینے کی سفارش کا وزیر اعظم پاکستان نے منظوری دی ہے بہت جلد موٹروے پولیس کا دائرہ کار گلگت بلتستان تک وسعت دیا جائے گا۔