نگران وزیر اعلیٰ گلگت بلتستان جسٹس (ر) یار محمد نے محکمہ بلدیات اور دیہی ترقی کی جانب سے دیئے جانے والے محکمانہ بریفنگ کے موقع پر گفتگو کرتے ہوئے کہا کہ بلدیاتی انتخابات عوام کے بنیادی مسائل حل کرنے سمیت وسائل اور اختیارات کی نچلی سطح تک منتقلی کیلئے لازمی ہیں۔نگران حکومت بلدیاتی انتخابات کو یقینی بنانے کیلئے ہر ممکن تعاون فراہم کرے گی۔ میونسپل سروسز اور بنیادی مسائل حل کرنے کے حوالے سے بلدیات اوردیہی ترقی کا محکمہ انتہائی اہم کا حامل ہے۔ محکمہ بلدیات کے تحت منصوبوں کی تعمیر میں شفافیت اور معیار کو یقینی بنانے کیلئے سیکریٹری بلدیات کے انقلابی اقدامات قابل تحسین ہیں۔ نگران وزیر اعلیٰ نے اس موقع پر غیر قانونی تعمیرات کے خلاف مزید سخت اقدامات کرنے کی ہدایت کی۔ ویسٹ مینجمنٹ کمپنی کے قیام سے صفائی کے نظام میں بہتری آئی ہے جس سے گلگت بلتستان کے عوام مطمئن ہیں۔ اس نظام کو مزید موثر اور بہتر بنانے کیلئے عوام کو بھی بھرپور تعاون کرنے کی ضرورت ہے۔ وسائل کے بغیر مسائل کو حل کرنا اور بنیادی سہولیات کی فراہمی میں مشکلات درپیش ہوتی ہیں۔ ہسپتالوں کے صفائی کا نظام ویسٹ مینجمنٹ کمپنی کے سپردکرنے سے ہسپتالوں کی صفائی میں بہتری آئی ہے۔ عوام کو صاف پانی کی فراہمی کیلئے واش یونٹ کے تحت جدید لیبارٹریز کے قیام سے عوام کو حفظان صحت کے مطابق صاف پانی کی فراہمی ممکن ہوسکے گی۔ اے آر ڈی پی کے تحت منصوبوں کی تعمیر سے بروقت منصوبوں کو مکمل کرنے میں مدد ملے گی۔ نگران وزیر اعلیٰ نے محکمہ بلدیات اور دیہی ترقی کی کارکردگی اور شفافیت کو یقینی بنانے کیلئے کئے جانے والے اقدامات پر اطمینان کا اظہار کرتے ہوئے ادارے کو درپیش مسائل حل کرنے کیلئے ہر ممکن تعاون کا یقین دلایا۔
