گورنر گلگت بلتستان سید مہدی شاہ سےآغا خان فاؤنڈیشن پاکستان کے چیف ایگزیکٹو آفیسر محمد اختر اقبال کی ملاقات

گورنر گلگت بلتستان سید مہدی شاہ سے اسلام آباد میں آغا خان فاؤنڈیشن پاکستان کے چیف ایگزیکٹو آفیسر محمد اختر اقبال نے ملاقات کی۔ ملاقات کے دوران گلگت بلتستان میں جاری ترقیاتی سرگرمیوں، سماجی و معاشی منصوبوں اور باہمی تعاون کے مختلف امور پر تفصیلی گفتگو ہوئی۔اس موقع پر گورنر گلگت بلتستان سید مہدی شاہ نے حالیہ دنوں میں سکردو میں آغا خان رورل سپورٹ پروگرام (AKRSP) کے دفتر کو نذرِ آتش کرنے کے واقعے پر شدید دکھ اور افسوس کا اظہار کیا۔ گورنر گلگت بلتستان سید مہدی شاہ نے کہا کہ آغا خان رورل سپورٹ پروگرام نے نہ صرف بلتستان بلکہ پورے گلگت بلتستان میں ترقی، کمیونٹی ڈویلپمنٹ اور عوامی فلاح و بہبود کے لیے ہمیشہ نمایاں خدمات انجام دی ہیں اور حکومت کے ساتھ مل کر خطے کی ترقی میں اہم کردار ادا کیا ہے۔گورنر گلگت بلتستان سید مہدی شاہ نے کہا کہ ایسے واقعات خطے کے پُرامن ماحول اور ترقیاتی عمل کے لیے نقصان دہ ہیں، لہٰذا ضروری ہے کہ تمام طبقات مل کر امن و استحکام کے فروغ کے لیے اپنا مثبت کردار ادا کریں۔گورنر گلگت بلتستان سید مہدی شاہ نے اس امید کا اظہار کیا کہ آغا خان رورل سپورٹ پروگرام آئندہ بھی گلگت بلتستان کی تعمیر و ترقی اور عوامی فلاح و بہبود کے لیے اپنا کردار جاری رکھے گا۔