خیبر پختونخوا حکومت کی جانب سے اے ڈی پی 2025-26 کی چوتھی سہ ماہی میں عوامی فلاحی شعبوں کیلئے 25.5 ارب روپے جاری

حکومت خیبر پختونخوا نے سالانہ ترقیاتی پروگرام 2025-26 کے تحت جاری منصوبوں کے لیے چوتھی سہ ماہی کے ترقیاتی فنڈز کی مد میں 25 ارب 52 کروڑ 91 لاکھ 21 ہزار روپے کےاجرا کی منظوری دے دی ہے۔ان جاری فنڈز میں ان شعبوں کو ترجیح دی گئی ہے جن کا براہ راست تعلق عوامی فلاح و بہبود اور خدمات کی فراہمی سے ہے۔ صحت، تعلیم، پینے کے پانی و صفائی، سڑکیں، آبپاشی و آبی انتظام، زراعت اور بلدیات کے شعبوں کے لیے خطیر رقوم مختص کی گئی ہیں تاکہ ضروری خدمات اور ترقیاتی منصوبوں کی بلاتعطل تکمیل یقینی بنائی جا سکے۔صحت کے شعبے کے تحت ہسپتالوں، بنیادی مراکز صحت اور جاری صحت پروگراموں کے لیے ایک ارب 40 کروڑ روپے جاری کیے گئے ہیں۔ پینے کے پانی و صفائی کے شعبے کے لیے ایک ارب 13 کروڑ روپے مختص کیے گئے ہیں تاکہ شہری و دیہی علاقوں میں پانی کی فراہمی اور صفائی کے منصوبوں کو وسعت دی جا سکے۔ تعلیم کے شعبے میں ابتدائی و ثانوی تعلیم کے لیے 69 کروڑ 63 لاکھ اور اعلیٰ تعلیم کے لیے ایک ارب 10 کروڑ 56 لاکھ جاری کیے گئے ہیں تاکہ اسکولوں، کالجوں اور جامعات کے بنیادی ڈھانچے اور تعلیمی سہولیات کو بہتر بنایا جا سکے۔رابطے اور رسائی کو بہتر بنانے کے لیے سڑکوں کے شعبے کے لیے 3 ارب 74 کروڑ 26 لاکھ، جو اس قسط میں سب سے بڑی رقم ہے۔ آبپاشی، سیلاب سے تحفظ اور آبی انتظام کے منصوبوں کے لیے آبی شعبے کو 3 ارب 73 کروڑ 44 لاکھ دیے گئے ہیں۔ زراعت کے شعبے کے لیے 58 کروڑ 91 لاکھ اور بلدیات کے لیے ایک ارب 77 کروڑ 65 لاکھ روپے مختص کیے گئے ہیں تاکہ دیہی معیشت اور بلدیاتی خدمات کو مزید بہتر بنایا جا سکے۔ محکمہ منصوبہ بندی و ترقی کے حکام کا کہنا ہے کہ فنڈز کے اجرا کا مقصد ترقیاتی منصوبوں کی تکمیل میں تیزی لانا اور مالی سال کے اختتام سے قبل عوامی خدمات کی فراہمی میں بہتری لانا ہے۔ تمام محکموں کو ہدایت کی گئی ہے کہ ترقیاتی کاموں میں تیزی لائی جائے اور مالی نظم و ضبط کو یقینی بنایا جائے۔حکومت خیبر پختونخوا کا عزم ہے کہ ترقیاتی منصوبوں کے اثرات عوام کو براہ راست منتقل ہوں