مون سون و موسم برسات پیشگی انتظامات کے حوالے سے لاہور انتظامیہ کے اہم پوائنٹس کے دورے۔ کمشنر لاہور مریم خان نے ڈی سی لاہور کیپٹن ر علی اعجاز کے ہمراہ راوی کے اہم پوائنٹس شاہدرہ، کالا خطائی روڈ اور ریلوے ٹریک روڈز ایریا کا دورہ کیا۔ اس موقع پر چیف انجینیر اریگیشن لاہور ریجن نے اہم پوائنٹس پر اقدامات اور پلاننگ پر بریفنگ دی۔ بریفنگ میں شاہدرہ سائفن سے اہم پوائنٹس تک سٹرکچرز کی کیپیسٹی و تیاریوں کا جائزہ پیش کیا گیا۔اس موقع پر کمشنر لاہور مریم خان نے محکمہ ایریگیشن اور ضلعی انتظامیہ کو ہدایات دیتے ہوئے کہا کہ بندوں کے پشتوں کی مضبوطی، پانی کے بہاو میں رکاوٹوں کا خاتمہ اہم ترین اقدامات میں شامل ہیں، ہر ضلع محکمہ موسمیات اور محکمہ آبپاشی سے ہمہ وقت رابطہ میں رہے۔ لاہور، شیخوپورہ، قصور اور ننکانہ ضلعی ڈیزاسٹر مینیجمنٹ کمیٹیوں کو مکمل متحرک کریں۔ انہوں نے کہا کہ ڈی سلٹنگ آپریشنز مون سون انتظامات کے حوالے سے پوری ڈویژن کا سب سے بڑا ہدف ہیں، پوری ڈویژن میں ڈی سلٹنگ آپریشنز چیف انجینرز اریگیشن کی نگرانی میں مکمل ہونے چاہییں۔ لاہور، شیخوپورہ و قصور کی 122ڈرینز میں ڈی سلٹنگ آپریشنز جاری ہیں، محکمہ اریگیشن، ضلعی انتظامی افسران اور واسا اشتراک کار کے ساتھ کام کریں اور تمام نالوں اور سٹارم واٹر نالوں کی ڈی سلٹنگ آپریشنز کو سو فیصد مکمل کریں۔کمشنر لاہور نے کہا کہ سیم نالوں کی گزرگاہوں میں صفائی اور تجاوزات خاتمہ آپریشنز کیے جائیں، سیلابی نالوں ایریاز میں سیلابی صورتحال سے نمٹنے کیلیے فوری مشینری دستیابی کی پلاننگ کریں۔ انہوں نے کہا کہ اربن فلڈنگ صورتحال سے نمٹنے کیلئے شہری سیوریج و ڈرینز کو خصوصی فوکس کیا جائے، پیشگی مون سون اقدامات سے ہی آمدہ صورتحال میں چیلنجز سے نبرد آزما ہو سکتے ہیں۔
کمشنر لاہور مریم خان کا ڈی سی کیپٹن ر علی اعجاز کے ہمراہ راوی کے اہم پوائنٹس شاہدرہ، کالا خطائی روڈ اور ریلوے ٹریک روڈز ایریا کا دورہ
