ضلعی انتظامیہ لاہور شہریوں کو جائیداد اور زمین سے متعلقہ معاملات میں انصاف فراہم کرنے کے لیے تمام تر انتظامی وسائل بروئے کار لا رہی ہے تاکہ ریونیو سسٹم میں عوامی سہولت کو یقینی بنایا جا سکے۔ اسی سلسلے میں ڈپٹی کمشنر لاہور کیپٹن (ر) محمد علی اعجاز کی خصوصی ہدایت پر ایڈیشنل ڈپٹی کمشنر ریونیو (اے ڈی سی آر) کریم داد چغتائی نے ڈی سی آفس میں ریونیو کھلی کچہری کا انعقاد کیا جہاں انہوں نے شہریوں کے جائیداد، زمین کی تقسیم اور انتقالات سے متعلقہ پیچیدہ مسائل سنے۔ ریونیو عدالتوں کے روزانہ کی بنیاد پر انعقاد کا مقصد شہریوں کو طویل قانونی چارہ جوئی سے بچا کر ان کے مسائل کا فوری اور تیکنیکی حل نکالنا ہے تاکہ وہ کسی بھی قسم کے استحصال سے محفوظ رہ سکیں۔ آج کی سماعت کے دوران مجموعی طور پر 19 کیسز پیش کیے گئے جن میں زمین کی تقسیم، عدالتی فیصلوں پر عملدرآمد اور ریونیو ریکارڈ کی درستی سے متعلق مختلف نوعیت کی شکایات شامل تھیں۔ ایڈیشنل ڈپٹی کمشنر ریونیو نے فریقین کے بیانات اور ریکارڈ کی جانچ پڑتال کے بعد بیشتر زیر التوا کیسز میں موقع پر ہی حتمی فیصلے صادر کر دیے اور متعلقہ عملے کو فوری عملدرآمد کے احکامات جاری کیے۔ بریفنگ کے دوران بتایا گیا کہ ریونیو عدالتوں کے ذریعے اب تک سینکڑوں شہریوں کو جائیداد کے تنازعات سے چھٹکارا مل چکا ہے اور یہ عمل بغیر کسی تعطل کے روزانہ کی بنیاد پر جاری رہے گا۔ ایڈیشنل ڈپٹی کمشنر ریونیو کریم داد چغتائی نے موقع پر موجود سائلین سے گفتگو کرتے ہوئے کہا کہ جائیداد کے تنازعات کا فوری حل ضلعی انتظامیہ کی اولین ترجیح ہے اور ہم زمین کے معاملات میں ہر سطح پر انصاف کی فراہمی کو یقینی بنا رہے ہیں تاکہ عام آدمی کے حقوق کا تحفظ ہو سکے۔ انہوں نے واضح کیا کہ ریونیو سسٹم کو جدید خطوط پر استوار کر کے اسے مکمل طور پر عوامی سہولت کے سانچے میں ڈھال دیا گیا ہے جہاں میرٹ اور شفافیت پر کوئی سمجھوتہ نہیں کیا جائے گا۔ ڈپٹی کمشنر لاہور کیپٹن (ر) محمد علی اعجاز نے ریونیو عدالتوں کی کارکردگی پر اطمینان کا اظہار کرتے ہوئے ہدایت کی کہ کیسز کے بروقت فیصلوں سے شہریوں میں پائے جانے والے اضطراب کو ختم کیا جائے اور انتقالات کے عمل میں کسی قسم کی تاخیر برداشت نہ کی جائے۔ انہوں نے مزید کہا کہ جائیداد کے حقوق کا تحفظ ایک محفوظ معاشرے کی بنیاد ہے اور ضلعی انتظامیہ لاہور اس مشن کو ہر صورت کامیاب بنائے گی تاکہ شہریوں کو سرکاری دفاتر کے بار بار چکر نہ لگانے پڑیں اور ان کا قیمتی وقت اور سرمایہ محفوظ رہ سکے۔ اجلاس کے اختتام پر ڈی سی لاہور نے واضح کیا کہ ریونیو افسران کی کارکردگی کو براہِ راست عوامی اطمینان سے جوڑا گیا ہے اور بہترین نتائج دینے والے افسران کی حوصلہ افزائی جاری رکھی جائے گی تاکہ لاہور کا ریونیو ماڈل پورے صوبے کے لیے ایک مثال بن سکے۔
ایڈیشنل ڈپٹی کمشنر ریونیو لاہور کریم داد چغتائی کی ڈی سی آفس میں ریونیو کھلی کچہری
