یومِ آزادی کے موقع پر خیبرپختونخوا میں جدید اور ٹیکنالوجی پر مبنی تعلیم کے ایک نئے دور کا آغاز ہوگیا۔ پشاور میں قائم گلوبل ورچوئل اسکول سے صوبے کے مختلف علاقوں میں آن لائن تعلیم کا باقاعدہ آغاز کردیا گیا۔اس اہم منصوبے کا افتتاح وزیرِ ابتدائی و ثانوی تعلیم خیبرپختونخوا ارشد ایوب خان نے چیف سیکرٹری خیبرپختونخوا شہاب علی شاہ کے ہمراہ کیا۔ تقریب میں سیکرٹری محکمہ تعلیم محمد خالد اور منیجنگ ڈائریکٹر ایجوکیشن فاؤنڈیشن قیصر عالم بھی موجود تھے۔اپنے خطاب میں وزیرِ تعلیم ارشد ایوب خان نے کہا کہ گلوبل ورچوئل اسکول صوبے کے تعلیمی نظام کو جدید تقاضوں سے ہم آہنگ کرنے کی جانب ایک اہم قدم ہے۔ جدید ٹیکنالوجی، مصنوعی ذہانت اور ورچوئل لرننگ کے ذریعے بالخصوص دوردراز علاقوں کے بچوں کو معیاری تعلیم تک رسائی کے نئے مواقع فراہم کیے جائیں گے۔ انہوں نے کہا کہ حکومت، تعلیم کے شعبے میں ڈیجیٹل تبدیلی، جدید تدریسی طریقوں اور AI کے مؤثر استعمال کو فروغ دے رہی ہے تاکہ طلبہ کو مستقبل کی ضروریات کے مطابق تعلیم اور مہارتیں فراہم کی جاسکیں۔چیف سیکرٹری خیبرپختونخوا شہاب علی شاہ نے کہا کہ گلوبل ورچوئل اسکول صوبے میں تعلیم کی رسائی اور معیار بہتر بنانے کے لیے ایک اہم سنگِ میل ہے۔ انہوں نے جدید ٹیکنالوجی کو تعلیمی نظام کا حصہ بنانے اور دوردراز علاقوں کے طلبہ کو یکساں تعلیمی مواقع فراہم کرنے کی اہمیت پر زور دیا۔ چیف سیکرٹری نے کہا کہ ڈیجیٹل اور AI پر مبنی تعلیم مستقبل کی ضرورت ہے اور حکومت خیبرپختونخوا جدید ٹیکنالوجی کے ذریعے تعلیمی نظام میں بہتری اور جدت کے عمل کو مزید آگے بڑھائے گی۔ انہوں نے منصوبے کو مؤثر انداز میں آگے بڑھانے اور اس کے ثمرات زیادہ سے زیادہ طلبہ تک پہنچانے کی ضرورت پر بھی زور دیا۔وزیرِ اعلیٰ خیبرپختونخوا کی ہدایت پر تیار کیا گیا گلوبل ورچوئل اسکول جدید ورچوئل کلاس رومز، ڈیجیٹل لیبارٹریز، پوڈکاسٹ اسٹوڈیو اور اساتذہ کی تربیت کے لیے جدید ٹریننگ ہال پر مشتمل ہے۔ یہ تعلیمی مرکز صوبے بھر کے ورچوئل تعلیمی نظام کا مرکزی فوکل پوائنٹ ہوگا، جہاں 500 سے زائد سکول آن لائن منسلک ہوں گے۔ منصوبے میں AI پر مبنی تدریسی نظام بھی شامل ہے، جس کے ذریعے طلبہ و طالبات کو مختلف زبانوں میں آن لائن تعلیم فراہم کی جاسکے گی۔گلوبل ورچوئل اسکول کا قیام خیبرپختونخوا میں تعلیمی مواقع کو مزید وسعت دینے، ڈیجیٹل تقسیم کم کرنے اور ہر بچے تک معیاری تعلیم پہنچانے کے حکومتی عزم کی عملی عکاسی ہے-
*خیبرپختونخوا، یومِ آزادی پر گلوبل ورچوئل سکول سے ڈیجیٹل تعلیم کے نئے دور کا آغاز*
