ترجمان میئر کراچی اور کراچی میٹروپولیٹن کارپوریشن میں پیپلزپارٹی کے پارلیمانی لیڈرکرم اللہ وقاصی نے کہا ہے کہ کراچی کے شہریوں کو بنیادی سہولتوں کی فراہمی اور مختلف علاقوں میں پانی و سیوریج کے مسائل کے حل کے لیے موثر اقدامات کیے جا رہے ہیں۔ بلدیہ اور کیماڑی ٹاؤن سمیت شہر کے مختلف علاقوں میں پانی کی فراہمی کے نظام کو بہتر بنانے، نکاسی آب کے مسائل دور کرنے اور جاری ترقیاتی و بحالی کے منصوبوں کو بروقت مکمل کرنے پر خصوصی توجہ دی جا رہی ہے۔پارلیمانی لیڈر کے ایم سی کرم اللہ وقاصی نے کہا کہ عید میلاد النبی ﷺ سے قبل ترقیاتی کاموں کو مکمل کرنے کے لیے متعلقہ اداروں اور منتخب نمائندوں کے درمیان رابطہ مزید موثر بنایا گیا ہے۔ بالخصوص عید میلاد النبی ﷺ کے جلوس کے راستوں پر صفائی، سڑکوں کی بہتری، پیور بلاک کی تنصیب، پانی و سیوریج کی سہولت اور دیگر ضروری اقدامات یقینی بنائے جائیں گے تاکہ عاشقانِ رسول ﷺ کو کسی قسم کی دشواری کا سامنا نہ ہو۔ ترجمان میئر کراچی کرم اللہ وقاصی نے بتایا کہ میئر کراچی بیرسٹر مرتضیٰ وہاب کی زیر صدارت ڈسٹرکٹ کیماڑی سے متعلق ایک اہم اجلاس واٹر اینڈ سیوریج بورڈ کے دفتر میں منعقد ہوا جس میں ڈسٹرکٹ کیماڑی کے صدر و رکن صوبائی اسمبلی لیاقت علی آسکانی، کراچی واٹر اینڈ سیوریج کارپوریشن کے افسران، چیف آپریٹنگ افسر اسد اللہ، پیپلز پارٹی کے ٹاؤن چیئرمین مورڑو میر علی اکبر سمیت دیگر منتخب نمائندگان اور متعلقہ افسران نے شرکت کی۔اجلاس میں ڈسٹرکٹ کیماڑی کی مختلف یونین کمیٹیوں میں پانی اور سیوریج سے متعلق امور، شہریوں کو درپیش مسائل اور جاری ترقیاتی و بحالی کے کاموں کا تفصیلی جائزہ لیا گیا۔ متعلقہ افسران سے منصوبوں پر پیش رفت کی بریفنگ لی گئی جبکہ مسائل کے فوری حل کے لیے باہمی مشاورت سے ضروری احکامات بھی جاری کیے گئے۔ پارلیمانی لیڈر کے ایم سی کرم اللہ وقاصی نے کہا کہ منتخب نمائندوں اور متعلقہ اداروں کے درمیان مسلسل رابطے کے ذریعے عوامی مسائل کے حل میں مزید تیزی لائی جا سکتی ہے۔انہوں نے کہا کہ میئر کراچی بیرسٹر مرتضیٰ وہاب کی قیادت میں بلدیہ عظمیٰ کراچی شہریوں کو سہولتوں کی فراہمی کے لیے عملی اقدامات کر رہی ہے۔ شہر کے مختلف علاقوں میں ترقیاتی منصوبوں کے ساتھ پانی اور سیوریج کے نظام کی بہتری کو بھی ترجیح دی جا رہی ہے۔ترجمان میئر کراچی کرم اللہ وقاصی نے میئر کراچی کے رات گئے شہر کے مختلف علاقوں کے اچانک دورے کا بھی ذکر کرتے ہوئے کہا کہ بیرسٹر مرتضیٰ وہاب نے رات گئے پیدل آئی آئی چندریگر روڈ، کھارادر، میٹھادر اور اولڈ سٹی ایریا کے مختلف حصوں کا دورہ کیا۔ دورے کے دوران مختلف سڑکوں اور گلیوں کی صورتحال، جاری خوبصورتی کے کاموں اور دیگر ترقیاتی منصوبوں کا تفصیلی جائزہ لیا گیا جبکہ متعلقہ حکام سے جاری کاموں کے حوالے سے بریفنگ بھی لی گئی۔ میئر کراچی نے متعلقہ افسران کو سڑکوں اور گلیوں کی صورتحال مزید بہتر بنانے اور شہریوں کو درپیش مسائل کے فوری ازالے کے لیے ضروری اقدامات کی ہدایات جاری کیں۔ پارلیمانی لیڈر کے ایم سی کرم اللہ وقاصی نے کہا کہ میئر کراچی کا رات گئے پیدل شہر کا دورہ اس امر کا واضح اظہار ہے کہ شہری مسائل کے حل کے لیے صرف دفتری اجلاسوں تک محدود رہنے کے بجائے زمینی صورتحال کا براہِ راست جائزہ لیا جا رہا ہے۔ میئر کراچی کا کہنا ہے کہ شہریوں کے مسائل حل کرنا انتظامیہ کی ذمہ داری ہے اور جب تک شہریوں کو درپیش مسائل حل نہیں ہوتے اس وقت تک آرام سے نہیں بیٹھیں گے۔ترجمان میئر کراچی کرم اللہ وقاصی نے کہا کہ گلستانِ جوہر کی مختلف یونین کونسلز میں بھی بحالی اور ترقیاتی کام مکمل کیے گئے ہیں۔ میئر کراچی کے مطابق ان علاقوں میں تقریباً چودہ کروڑ پچاس لاکھ روپے کی لاگت سے پیور بلاک کی تنصیب سمیت دیگر ترقیاتی کام مکمل کیے گئے، جبکہ مختلف علاقوں میں تقریباً دو لاکھ اکہتر ہزار مربع فٹ پیور بلاک نصب کیا گیا ہے۔ ان اقدامات کا مقصد شہریوں کو بنیادی سہولتیں فراہم کرنا اور کراچی کے مختلف علاقوں میں بلاامتیاز ترقیاتی کام یقینی بنانا ہے۔انہوں نے مزید بتایا کہ شہر کی مرکزی شاہراہوں پر اسٹریٹ لائٹس کو شمسی توانائی پر منتقل کرنے کے منصوبے کو بھی وسعت دی جا رہی ہے۔ شاہراہِ سعدی پر اسٹریٹ لائٹس کو شمسی توانائی پر منتقل کرنے کا کام تیزی سے جاری ہے، جس سے بجلی کے استعمال میں کمی کے ساتھ شہریوں کو بہتر روشنی کی سہولت فراہم کرنے میں مدد ملے گی۔ پارلیمانی لیڈر کے ایم سی کرم اللہ وقاصی نے کہا کہ کراچی کی ترقی کے لیے تمام متعلقہ اداروں، منتخب نمائندوں اور انتظامیہ کے درمیان مربوط تعاون ضروری ہے۔ کراچی واٹر اینڈ سیوریج کارپوریشن کے دفتر میں مختلف ٹاؤن چیئرمینز اور افسران سے ہونے والی ملاقاتوں میں بھی شہر کے پانی و سیوریج کے مسائل، جاری ترقیاتی منصوبوں اور بحالی کے کاموں پر تفصیلی گفتگو کی گئی ہے۔ ترجمان میئر کراچی کرم اللہ وقاصی نے کہا کہ ڈسٹرکٹ کیماڑی کے مسائل کے حل کے لیے بھی مسلسل رابطہ جاری ہے اور مختلف یونین کمیٹیوں میں جاری ترقیاتی و بحالی کے کاموں کی نگرانی کی جا رہی ہے۔ ڈسٹرکٹ کیماڑی کے صدر و رکن صوبائی اسمبلی لیاقت علی آسکانی اور دیگر منتخب نمائندگان سے ہونے والی ملاقاتوں میں عوامی مسائل اور ترقیاتی منصوبوں کی پیش رفت کا جائزہ لیا گیا۔انہوں نے کہا کہ عید میلاد النبی ﷺ کے موقع پر جلوس کے تمام اہم راستوں پر ضروری بلدیاتی اقدامات مکمل کرنا ترجیح ہے۔ پیور بلاک کی تنصیب، سڑکوں کی بہتری، صفائی، پانی اور سیوریج سے متعلق انتظامات سمیت دیگر ضروری کام عید میلاد النبی ﷺ سے قبل مکمل کرنے کے لیے متعلقہ اداروں کو متحرک رکھا گیا ہے۔ کراچی کی ترقی، شہریوں کو بنیادی سہولتوں کی فراہمی اور عوامی مسائل کا فوری حل موجودہ بلدیاتی قیادت کی ترجیحات میں شامل ہے۔
