میئر کراچی بیرسٹر مرتضیٰ وہاب نے شہر کی مرکزی شاہراہوں پر اسٹریٹ لائٹس کو سولر انرجی پر منتقل کرنے کے منصوبے کو مزید وسعت دینے کا اعلان کرتے ہوئے بلدیہ عظمیٰ کراچی کو شہر کی مزید اہم شاہراہوں پر کام شروع کرنے کی ہدایت کردی ہے، مرکزی شاہراہوں پر سولر لائٹس کی تنصیب کے مثبت نتائج کے بعد اس منصوبے کا دائرہ کار بڑھایا جا رہا ہے، میئر کراچی بیرسٹر مرتضیٰ وہاب نے کہا کہ شہر کی اہم شاہراہوں پر اسٹریٹ لائٹس کو سولر انرجی پر منتقل کرنے سے بجلی کی بچت کے ساتھ ساتھ شہریوں کو بہتر اور مسلسل روشنی کی سہولت فراہم ہوگی، بلدیہ عظمیٰ کراچی شہر کی ضروریات کو مدنظر رکھتے ہوئے توانائی کے متبادل اور ماحول دوست ذرائع کے استعمال کو فروغ دے رہی ہے،انہوں نے کہا کہ شاہراہِ سعدی پر اسٹریٹ لائٹس کو سولر انرجی پر منتقل کرنے کا کام تیزی سے جاری ہے جبکہ آنے والے دنوں میں شہر کی مزید اہم اور مرکزی شاہراہوں پر بھی سولر اسٹریٹ لائٹس کی تنصیب کا کام شروع کیا جائے گا، اس منصوبے کا مقصد شہریوں کو بہتر سہولیات کی فراہمی کے ساتھ ساتھ توانائی کے اخراجات میں کمی لانا ہے،میئر کراچی نے بلدیہ عظمیٰ کراچی کے متعلقہ محکموں کو ہدایت کی کہ سولر اسٹریٹ لائٹس کی تنصیب کے کام کو مقررہ مدت میں مکمل کیا جائے اور شہر کی دیگر اہم شاہراہوں کو بھی مرحلہ وار سولر انرجی پر منتقل کرنے کے لیے جامع منصوبہ بندی کی جائے، انہوں نے کہا کہ کراچی میں جدید، ماحول دوست اور پائیدار نظام متعارف کرانے کے لیے عملی اقدامات جاری رکھے جائیں گے۔
